د.سهعید خودێدا:بنگههێ لالش سازییهكا ئێزدیناسى و جڤاكى و رهوشهنبیرى یه د چارچۆڤێ حكومهتا ههرێما كوردستانێ دا
تۆرا لالش یا راگههاندنێ :
جێگرێ سهرۆكێ بنگههێ لالش دیاركر،پشتى سهرهلدانا پیرۆزا سالا 1991ێ ل باشورێ كوردستانێ ل رێككهفتى(12/5/1993)بنگههێ لالش هاته دامهزراندن و كهسانێن هزر و بۆچۆن ئازاد د بنگههى دا كاركرینه،بنگههێ لالش سازییهكا ئێزدیناسى و جڤاكى و رهوشهنبیرى یه د چارچۆڤێ حكومهتا ههرێما كوردستانێ دا.
د.سهعید خودێدا،جێگرێ سهرۆكێ بنگههێ لالش د چاڤپێكهفتنهكێ دا بۆ مالپهرێ دهنگێ ئهمریكا دیاركر،بنگههێ لالش یێ رهوشهنبیرى و جڤاكى كۆنگرێ خۆ یێ چاردێ سازكر و دهستهكهكا نوو هاته ههلبژارتن كو ژ 15 ئهندامان پێكدئێت و كار و بهرپرسیارهتیێن ههر ئهندام و لژنهكێ هاتنه دهستنیشانكرن،كۆنگرهى بریار دایه ههرسێ سالان جارهكێ ههلبژارتن بێنه سازكرن و دهستهكهكا نوو بێته ههلبژارتن،ب ئامادهبوونا ئهندامێن دهستهكا بلند و بهرپرسێن تایى و نڤیسنگههان،بنگههێ لالش كۆمبوونا خۆ یا ئاسایى گرێدا بریار هاته دان پلان و بهرنامهیهكێ سێ سالى بۆ بنگههى بێته ئامادهكرن،ههروهسا دهستهكا بهرێ یا بنگههى بریار دابوو پهیكهرهك بێـته چێكرن بۆ خودێ ژێ رازى پیر خدر سلێمان كو ئێك ژ دامهزینهرێ بنگههێ لالش و نڤیسكار و خزمهتكارێ دیرۆكا ئێزدى و ئێزدیاتیێ و پێكڤهژیانێ و خهباتكارێ كوردستانێ بوو دێ ل ئاڤاهیێ بنگههێ لالش ئێـته دانان دهستهكا مه یا نوو ئهوێ بریارێ دێ جێبهجێكهت و پهرتۆكخانا بنگههێ لالش دێ ب ناڤێ وى ئێته ناڤكرن ئهڤهژى وهكو رێزگرتن بۆ گیان و خزمهتا وى.
خویاكر ژى د كۆمبوونێ دا بریار هاته دان بهرههمێن نڤیسهران بێنه چاپكرن یێن ل دۆر ئێزدى و ئێزدناسیێ و ئێزدیاتیێَ و دیرۆكا پێكهاتیێن كوردستانێ،دیسان دێ رژدیێ ل سهر دیكیۆمێنتكرنا زارهكى یا ئێزدیان و دیرۆكا جوگرافیا گوند و دهڤهرێن ئێزدیان كهین.
گۆتژى پشتى سهرهلدانا پیرۆزا سالا 1991ێ ل باشورێ كوردستانێ ل رێككهفتى(12/5/1993)بنگههێ لالش هاتیه دامهزراندن و كهسانێن هزر و بۆچۆن ئازاد د بنگههى دا كاركرینه،بنگههێ لالش سازییهكا ئێزدیناسى و جڤاكى و رهوشهنبیرى یه د چارچۆڤێ حكومهتا ههرێما كوردستانێ دا و حكومهت ژى ژ چهندین لایهن و پارتێن سیاسى پێكدهێت،سهرۆك مهسعود بارزانى گۆتى یه(ب ههموو شیانان پشتهڤانێن ئێزدیاین، لێ د بریار دانێ دا ئێزدى د سهربهخۆنه).
س.س
تُتاح هذه الصورة أيضا في: کوردی