ئێزدیێن ئەوروپا داخوازێ ژ جڤاتا رۆحانی دكن گهۆرینەك ل سەر نەختێ كچان بێتەكرن
دەنگێ لالش،سالار فائز 
گرانیا بارێ ئابووری كارتێكرنا خۆ ل سەر گەنجێن ئێزدی ل وەلاتێ ئەلمانیا كریە كو هەڤژینیێ پێك بینن،سەرەرای هندێ نەختێ كچان هەفت هەزار یۆرۆیە بوویە ئاستەنگ ل بەردەم گەنجان و دلگرانكرینە،گرۆپەكێ كچ و كوران دەست ب ئەنجامدانا هەوەكێ كرینە ژبۆ كێمكرنا نەختی،هەڤدەم ژی زەلامێن ئاینی و چالاكڤان داخوازێ ژ جڤاتا رۆحانیا ئێزدیان دكن گهۆرینەك ل سەر نەختی بێتەكرن ل ئەوروپا.
زەلامێ ئاینی یێ ناڤدار (مەروان بابیری) دبێژت:دڤێت نەخت ئانكو قەلەن بێتە راستڤەكرن وەكی قەلەنێن كچێن ئێزدی ل عێراقێ لێ بێت كو 75 گەرامێت زێری بن ونابت ژبنی بێتەراكرن،چنكو گرنتیكرنا مافێ كچا ئێزدی پتر دئێتەكرن،بەلێ ل حالەتێ بەردانا كچێ و خەلەتی بۆ زەلامی بزڤرت ئەوژی ب رێیا دۆسا دادگەهێ ل ڤێدەرێ دڤێت زەلام گوژمەكێ دراڤی ب دەت وئەڤ گوژمە دڤێت بێتە دەستنیشانكرن و نڤیسین ل گرێبەستا ژنئێنانێ دا.
چالاكڤانا دبوارێ مافێ ئافرەتێ دا(گولیستان شنگالی) گۆت:تشتەكێ كرێتە ژن ب دراڤی وەكی كەلوپەلا بێتە فرۆتن و باشترە قەلەن یێ كێم بت،ژبەركو ل وەلاتێ خۆ مە هەژاری و تالان و كوشتن دیت،پاشی ئەم ب دراڤی هاتینە ئەلمانیا بارێ ژیانا هەركەسەكی یێ گرانە و ب ڤان نەختا كەس نكارت هەڤژینیێ بكت، لەورا دخوازم نەخت 75 گەرامێت زێری بت و ل گرێبەستا ژنئینانێ برەكی دراڤی بێتە نڤیسین وەكی( شرگ جزائی)و ل دەمێ ژن بەردانێ لایەنێ خوسارەت ل دۆسێ ئەو دێ دەت چی ژن یان زەلام بت.
هەروەسا(سامان داود) ئەو كەسەیە یێ ئَێكەمین جار بانگەوازا گهۆرینا قەلەنی كری ل ئەلمانیا دیاركر،ئەم ل ئەلمانیا دژین و هەرتشت یەكسانی یە ل ناڤبەرا ژن و زەلامی دا،ئەرێ بۆچی بۆ قەلەنی نەیەكسانی یە،دیسان هەركور و كچەكا ل ئەلمانیا بت مافێ وان گەرەنتی كریە وەك دراڤ موچێ هەیڤانە،لەورا دڤێت نەمینت،داخوازێ ژ جڤاتا رۆحانیا ئێزدیان دكەین گهۆرینەك ل سەر نەختی بێتەكرن ل ئەوروپا،ژبەركو نەختێ كچان هەفت هەزار یۆرۆیە بوویە ئاستەنگ ل بەردەم گەنجان و دلگرانكرینە.
ژبال خۆڤە چالاكڤانا كچ (فنار عەلی) خویاكر،ل ڤی سەردەمی جڤاكێ ئێزدی یێ بەرەڤ ست و خافیەكێ دچت تایبەت ل پەیوەندیێن كۆمەلایەتی ل ئەوروپا و دڤێت جارەكا دی ئەڤ پەیوەندینە ب هێز بكەڤن، ئەو ژی ب رێیا دروستكرنا خێزانەكێ ئەگەر ئەم هندەك ئاستەنگا ل رێیا ڤێ خێزانێ رانەكەین جارەكا دی جڤاكێ ئێزدی رانابتە سەر لنگێت خۆ ژ وان ئاستەنگا نەهێلانا نەختی و ژن ژی وەك زەلامێ خۆ بەشداریێ ل پێكئینانا ژیانا هەڤژینیێ بكت و هاریكارییا هەڤژینێ خۆ بكت مادی و مەعنەوی،تایبەت كچا ئێزدی ل ئەلمانیا نە پێتڤی ڤان نەختێت گرانە و گەلەك رێ هەینە مافێ وێ بێتە پاراستن دگەل وێ چەندێ مە نەخت نەمینت،ب تنێ ل گرێبەستا ژنئینانێ دا برەكی دراڤی بێتە نڤیسین و هەر ئالیەك خوسارەت بت ل دۆسا ژنبەردانێ دڤێت ئەو ب دەت.
تُتاح هذه الصورة أيضا في: کوردی
