Şingal – 3 endamên malbatekê şeş roj in wenda ne

BasNews – Li bajarê Şingalê 3 endamên malbatekê ev 6 roj in, wenda ne û nayê zanîn çi hatiye serê wan.

Welatiyekî xelkê Şingalê bi navê Şemo Nayîf Derwêş ji BasNewsê re got, dayka min û du birayên min ji roja 11 vê mehê ve li Şingalê wenda bûne. Em nizanin çi hatiye serê wan.

Şemo Nayîf Derwêş her wiha got, navê dayka min Nadir Husên Seydo û 44 salî ye, birayên min jî navê yekê Levend e û navê yê din jî Daxaz e û xelkê gundê Dûgirê yê Şingalê ne.

Wî welatiyê êzîdî da zanîn jî, dayka wî û birayên wî dixwastin biçin dixtor û got, ji ber wê jî gazî otomobîlekê kiribûn û demjimêr 13:00 roja 11 vê mehê li otomobîlê siwar bibûn û ji wê demê de wenda ne.

Şemo Nayîf Derwêş da xuyakirin, aramî û ewlehiya Şingalê ji ber komên çekdar gelekî aloz bûye, rojane revandin û wendakirin heye. Em daxwaz dikin çarenivîsa dayka min û birayên min eşkere bibe.