بارزانی: پێدڤییە بەغدا جودابوونێ قەبوول بکەت
WAAR-دهۆك:
سەرۆکێ ھەرێما کوردستانێ راگەھاند، بەغدا شەراکەتێ قەبوول ناکەت، ژ بەر ھندێ پێدڤییە جودابوونێ قەبوول بکەت، دوپاتکر کو دێ ب دانوستاندنان ژ ئیراقێ جودابن.
مەسعوود بارزانی سەرۆکێ ھەرێما کوردستانێ د کۆمبوونەکێ دا د گەل رۆژنامەنڤیس و نڤیسکارێن ههولێر دا بەحسا رێفراندۆما سەرخوەبوونا کوردستانێ کر و داخواز ژ خەلکێ کوردستانێ کر د رۆژا رێفراندۆمێ دا بریارێ ل سەر چارەنڤیسێ خوە بدەن.
بارزانی دیارکر ژی، ل سالا دوھزار و سێیێ کار بۆ ئیراقا نوو ھات کرن، لێ ھەموو ھەڤپشکییەک ھات شکاندن، دا زانین ژی ل سالا دوھزار و سێیێ شاشی بوو کورد چووینە بەغدایێ و گۆت: ل دووڤ قانوونێن نێڤدەولەتی رێفراندۆم مافەکێ قانوونی یە، دەستوورێ ئیراقێ ژی رێ پێ دایە، ھەروەسا تەئکید کر کو بەغدا شەراکەتێ قەبوول ناکەت، لەو پێدڤییە جودابوونێ قەبول بکەت.
سەرۆکێ ھەرێما کوردستانێ گۆت ژی: رێفراندۆمێ کارتێکرن ل سەر شەرێ داعشێ نابیت و ل ھەر جھەکێ بیت ئەو بەرھەڤن شەرێ دژی تیرۆرێ بکەن، تەکەز ژی کر کو نابیتە جھێ مەترسیێ ل سەر چو وەلاتێن ھەڤسوو، ئاماژەکر کو دێ بۆ جودابوونێ بەردەوام دانوستاندنان د گەل بەغدایێ دا ل سەر سنوور، ئاڤ و ئاسمانی ھێن کرن.
سەرۆکێ ھەرێما کوردستانێ د وێ کۆمبوونێ دا بەحس ل دەولەتا کوردستانێ کر و گۆت: دێ دەولەتەکا کۆماری، دیموکراسی، پەرلەمانی بیت.
تُتاح هذه الصورة أيضا في: کوردی