رێژا خەمۆكیێ دناڤ كەمپێن ئاوارێن شنگالێ دا زێدەبوویە
تۆرا لالش یا راگەهاندنێ/لەیت حسێن
خەمۆكی حالەتەكی دەروونی و هەلجۆنیە مرۆڤ تووش دبتێ و ل نك هەموو كەسی هەیە و چەندین نیشان هەنە،ژبەر چەند ئەگەر و كێشان نهۆ دكەمپێن ئاوارێن شنگالێ دا ل سنوورێ پارێزگەها دهۆكێ ب رێژەیەكا زۆر و بەرچاڤ پەیدابوویە و زێدەبوویە،دەروونناسەك ژی دبێژت ئەگەر خەمۆكی ب رێژەكا كێم بت ئاسایی یە زیانێ نا گەهینتە كەسایەتیا مرۆڤی.
(سەعدون حسێن)ئاوارەكی شنگالێ یە دبێژت:خەمۆكی بارەكی دەروونی یە مرۆڤ تووش دبتێ،وەك دیاردەكا دەروونی یە ل نك هەموو مرۆڤان یا هەی ب رێژەیەكا كێم و ئاسایی،لێ دكەمپان دا ب رێژەیەكا زۆر و بەرچاڤ ل ناڤ ئاوارەیان دا پەیدابوویە ژبەر چەندین ئەگەران هندەك ژ وانا كەس و كارێن خۆ ژ دەست دایە و هندەك ژێ ژ ئەگەرێ نە ڤەگەریانێ بۆ سەر جی و وارێن خۆ و نەبوونا دەرفەتێن كاری هەتا كو گەهشتیە وێ رێژەیێ ئەو خەلكە هزرا خۆ كوشتنێ بكن و دوو دلی و بێ باوەریەكا تەمام ل نك چێبوویە ژبەر ڤان ئەگەرێن مە دیاركرین و چەندین ئەگەرێن دی،رێژەیا خەمۆكیێ ل ناڤ كەمپێن ئاواران دا ژ هەموو جیێن دی زێدەتر سەرهلدایە،گۆتژی باوەری بخۆبوون ناخێ مرۆڤی ئارام دكەتن و دێ ژ خەمۆكیێ رزگاربت و تشتەكە نە ب مرۆڤ را ژ دایك دبت بەلكو دبت مرۆڤ باوەریێ بۆ خۆ چێكت لێ دناڤ جڤاكێ مەدا رێژا وێ گەلەك یا كێمە،ژبەركو ب راستی ژی كەتوارێ مە بوویە ئەگەر خەلك باوەریا خۆ بخۆ نە ئینیت ل ناڤ كەمپان دا تایبەتی ئەگەر كەسەك كارەكی خۆ بكت و گەلەك ئاریشە و ئاستەنگ بۆ پەیدا دبن دێ بتە ئەگەرێ ژ دەستدانا باوەریێ،هەروەسا ئەڤە نێزیكی چار سالانە ئاوارێن ئێزدی ژیانا خۆ ل ناڤ كەمپان ل سنوورێ پارێزگەها دهۆكێ ب تایبەتی دبەنە سەری و ژئەگەرێ نە ڤەگەراندنێ بۆ سەر جی ومالێن وان بێ باوەریەكا تەمام ل نك ئاوارێن دناڤ كەمپان دا چێبوویە.
(مەروان گاباری)گەنجەكی ئاوارەیێ شنگالێ یە گۆت:دناڤە ئاوارەیان دا ب رێژەیەكا زۆر بێ باوەری یا بەربەلاڤە ئەو ژی دزڤرت بۆ وێ چەندێ ئەو كەسێن بێ باوەری بوون ل نك پەیدابوویی یان باوەریا خۆ ژ دەست داین،گەلەك جاران هندەك گۆتن یان پەیڤ هاتینە گۆتن و ژێ باوەركرینە و ل داویێ ئەو پەیڤ بووینە دەرەو و دگەل بۆرینا دەمی ژ ئەگەرێ وێ چەندێ تووشی بێ باوەریێ بووینە،ئەو خەمۆكی ژ ئەگەرێ نەمانا باوەریێ و بارێ ژیانە وان یا خراب دناڤ كەمپان دا پەیدابوویە،هەروەسا پێتڤیە دناڤ ئاواران دا دەزگەه و رێكخراو و جیێن شۆلەژێ بڤێ چەندێ رابن و ب شێوەیەكی گشتی بۆ خەلكەكی ب ئاخڤن و هەول بدەن ڤان تشتان نەهێلن و بەردەوام خۆلێن دەروونی بێنە ڤەكرن و ل دەست پێكێ ئەو كەسێن ژ دەستێ داعش ئازادبووین یان ئەوێن ترس ل نك پەیدابووی و تووشی خەمۆكیێ بووین یان باوەریا خۆ ژ دەست داین پشكداریێ دوان خۆلا دا بكن ،ل دوڤ را هەول بدەن گەنجێن رەوشەنبیر و قوتابی ژی پشكداریێ د وان خۆلا دا بكن.
(ئەمین شەمۆ)مامۆستایەكە دیاركر،بێ باوەری ژ وێ چەندێ دئێت دەمێ مرۆڤ دگەهتە وی رادەی بێ هیڤی بت ژ ژیانێ و بڤی رەنگی باوەری ب چ كەسان نامینت،رەنگە ئەڤ بێ باوەریە ژ وێ چەندێ بێت كو گەلەك كەسان دەرەو یان ژی خیانەت لڤی مرۆڤی كربن،دهەمان حال دا خەمۆكی دئێت مرۆڤی چەندین كێشە و ئاریشە هەبن و چارەسەریا وان نە ل دەستێ مرۆڤان دابت،بڤێ یەكێ لپێش توو پرسگرێكەكا خۆ چارەسەر بكەی دێ ئێكا دی لێ زێدەبت،ئەڤجا دێ بارێ دەروونیێ مرۆڤان تێك چت و ئێشەكا وەكو خەمۆكیێ ل نك مرۆڤی پەیدابت.
لسەر ڤێ یەكێ دەروونناس (عزەت چوكی) دیاركر،خەمۆكی حالەتەكی دەروونی و هەلجۆنیە مرۆڤ تووش دبتێ،خەمۆكی وەك دیاردەكا دەروونی ل نك هەموو كەسی هەیە،ئەگەر ب رێژەكا كێم بت ئاسایی یە زیانێ نا گەهینتە كەسایەتیا مرۆڤی،بەلێ ئەگەر ب رێژەكا زۆر بت باندۆرەكا خراب لسەر ژیانا مرۆڤی دكت دبتە ئەگەرێ هندێ كارتێكرنێ ل پەیوەندیێن مرۆڤی یێن جڤاكی و كارێ مرۆڤی بكت،دیسان خەمۆكیێ چەندین نیشان هەنە دئێتە دەست نیشانكرن وەك(بێ گێولی،رەش بینی،گرنگی نەدان ب پاقژیا خۆ،كێم نڤستن یان گەلەك نڤستن،كێم خوارن یان گەلەك خوارن،سەر ئێشی و گێژبوون،هەست ب گونەهباریێ،نەمانا باوەریێ بخۆ،نەمانا پەیوەندیێن جڤاكی،ترس و دوو دلی ژ كەسێن دەوروبەری خۆ،هزرێن خۆ كوشتنێ و هەولا خۆ كوشتنێ)،بەلێ مەرج نینە ئەڤ نیشانە ل نك هەموو كەسی هەبن بەلێ ئەگەر نیڤەك یان پتر ژ نیڤەكا ڤان نیشانا ل نك كەسەكی هەبن بۆ ماوەیێ دوو هەفتیا ئەم دكارن گۆمانا خەمۆكیێ ژ وی كەسی بكن.
هەروەسا لدۆر چارەسەریا خەمۆكیێ دەروونناسی ئاشكەراكر،دڤێت مرۆڤ خۆ ژ گۆمانێ و دوو دلیێ دوور بكت و ب چاڤێ مرۆڤایەتیێ ل هەموو كەسی بنێرت،دیسان دڤێت مرۆڤ ب واقعی تەماشەی هەموو تشتان بكت تشتێ كچك مەزن نەكت و تشتێ مەزن كچك نەكت،چێنابت مرۆڤ خۆ ب هەموو تشتان ڤە مژوول بكت چنكو ژیان تژی ئاریشە و نەخۆشی یە دڤێت هەولا چارەسەریا نەخۆشیێن خۆ بكت،مرۆڤ بونەوەرەكی جڤاكی یە نكارت بتنێ بێژت كو دڤێت مرۆڤی پەیوەندیێن جڤاكی یێن باش هەبن دا تووشی خەمۆكیێ و دلتەنگیێ نەبت كو بەردەوام سەرەدانا هەڤال و دۆست و خزما بكت،نابت مرۆڤ بێكار بت چنكو بێكاری گەلەك ئاریشان بۆ مرۆڤی چێدكت،داخازێن ژیانێ گەلەك دڤێت مرۆڤ بەردەوام كار بكت دا بكاربت ژیانەكا خۆش بۆ خۆ دابین بكت،دڤێت مرۆڤ باش بزانت بوویەرێن ژیانێ رێژەیی نە ئانكو خۆشی و نەخۆشینە كو دڤێت مرۆڤ خۆ دگەل هەردوویان بگونجینت،هەروەسا هەولا چارەسەریا ئاریشێن خۆ بكت ب رێیێن گونجای.
تُتاح هذه الصورة أيضا في: کوردی