پارت و لایەنێن سیاسی رێگرن ل هەمبەر پشكداربوونا ژنا ئێزدی دپرۆسەیا سیاسی دا
دەنگێ لالش،چنار شمو قاسم
ژنا ئێزدی ل چەرخێ بەرێ و نۆكە دە گەلەك زولم و زۆری لێ هاتیە كرن ب تایبەت پشتی هێرشا تیرۆرستێن داعش كو ب شێوەیەكێ دوور ژ دیاردێن مرۆڤایەتیێ زولم لێكرن،سەرەرای ڤێ چەندێ خۆراگر بوویە و كاریە دناڤا جڤاكێ ئێزدی دا رۆلەكێ باش ببینت،ل هاتنا داعشێ ژنێ خەبات و بەرخودانكریە وەك پێشمەرگەی بەرەڤانیكریە و خوارن بۆ سەنگەرێن شەری بریە و ب هەلبەستێ و سترانا ورەیا پێشمەرگەی بلند كریە،چالاكڤانەك ژی دبێژت:ژنا ئێزدی رۆلەكێ كێم هەیە د پرۆسەیا سیاسی یا حكوومەتا هەرێما كوردستانێ دە،ژبەركو پارت و لایەنێن سیاسی رێگرن ل هەمبەر پشكداربوونا ژنا ئێزدی دپرۆسەیا سیاسی دا و داخوازا مافێ خۆ بكن دناڤا ڤێ پرۆسەیێ دە.
ل دۆر رۆلێ ژنا ئێزدی،چالاكڤان “كاوە عیدۆ” دیاركر:”رۆلێ ژنا ئێزدی دپرۆسەیا سیاسی دا كێم بوو،بەلێ بێ بەهر نەبوویە ،نموونە لسەر ڤێ یەكێ (مەیان خاتوونە) كو رۆلەكێ بەرچاڤ دڤێ پرۆسەیێ دە هەبوویە و گەلەك جاران دلاپەرێن دیرۆكی دە هاتیە بەلاڤكرن كو مەیان خاتوونێ هژمارەكا لەشكری بۆ بارزانی د هنارت ژبۆ هندەك ئەگەرێن سیاسی،دیسان هەر ل وی سەردەمی گەلەك جاران زولم و زۆری ل ژنا ئێزدی هاتیە كرن و هیچ مافەك نەبوویە،سەبارەت رۆلێ ژنێ دسەردەمێ نۆكەدا گۆت:ژنا كورد ب گشتی و یا ئێزدی ب تایبەتی رۆلەكێ بەرچاڤ هەبوویە مینا (ڤیان دەخیل) كو تەڤ جیهان هشیاركری ب وێ زلما داعش بەرامبەر ئێزدیان كری هەروەسان كچا رزگاربووی (نادیا موراد) گەهشتیە وی ئاستی كو ژنێن جیهانێ شانازیێ ب ژنا ئێزدی بكن،ژنا ئێزدی ل چەرخێ بەرێ و نۆكە دە گەلەك زولم و زۆری لێ هاتیە كرن ب تایبەت پشتی هێرشا تیرۆرستی یا داعش كو ب شێوەیەكێ دوور ژ دیاردێن مرۆڤایەتیێ زولم ل ئافرەتا ئێزدی كر،سەرەرای ڤێ چەندێ ژنا ئێزدی خۆراگر بوویە و كاریە دناڤا جڤاكێ ئێزدی دا رۆلەكێ باش ببینت و ئەڤە بوویە فاكتەرەكێ سەرەكی،ژبۆ ئاڤاكرنا خێزانا ئێزدیاتیێ و دیاربوویە كو ژنا ئێزدی ب شێوەیەكێ گەلەكێ بهێز هاتیە داناسین و نموونە لسەر ڤێ چەندێ ژی ئەو كچێن گرتی ژ ئالیێ تیرۆرستێن داعش ڤە و هاتین رزگار كرن و د بوارێ راگەهاندنێ دە رۆلەكی مەزن دیتین و بێ دەنگ نەماین لسەر وێ زلما لسەر وان هاتیە كرن و ئەم وەسا دبینن كو ژنا ئێزدی دێ پاشەرۆژەك باش ئاڤا بكت د بوارێ سیاسی و جڤاكی و رەوشەنبیری دە:”.
دبەردەوامیا ئاخفتنا خۆدە چالاكڤانی خویاكر:”ژنا ئێزدی كاریە هەتا ئاستەكێ بلند رۆلێ خۆ ببینت ب تایبەت ناساندنا ئاینێ ئێزدیان ب نەتەوە و وەلاتێن دی یێن جیهانێ،هەردیسان كچا رزگاربووی(نادیا موراد) پەیاما ژنا ئێزدی یا زولم فێكەتی ژ ئالیێ داعش ڤە ب تەڤایا جیهانێ گەهاندیە،لەوما ئەم دبینن ژنا ئێزدی رۆلێ خۆ د پتریا بواران دە دیتی یە و هەر ژ دەمێ پەیدابوونا مللەتێ ئێزدی ژنێ كارێ ناڤ مالێ و زەڤیان دكر لێ نها ژنا ئێزدی د بوارێ راگەهاندن و جڤاكێ مەدەنی و دام و دەزگەهان و بوارێ سیاسی دە پتر رۆلێ خۆ دبینە”.
عیدۆ تەكەست كر ژی ژنا ئێزدی رۆلەكێ كێم هەیە د پرۆسەیا سیاسی یا حكوومەتا هەرێما كوردستانێ دە،ژبەركو پارت و لایەنێن سیاسی رێ لبەرامبەر وێ گرتی یە كو پشكدار بت و داخوازا مافێ خۆ بكن دناڤا ڤێ پرۆسەیێ دە،لێ ئەم هیڤیدارن كو ئێدی ژنا ئێزدی نەبتە گوریكەرا لایەنێن سیاسی و ئێدی پتر گرنگیێ بدەنێ دڤێ پرۆسێ دە،داكو پتر دەرفەتێن داخوازكرنا مافێ خۆ هەبت دناڤا حكوومەتێ دە،ئەو چەندە ژی دیاركر،پێتڤیە ل سەر ژنا ئێزدی و یا كوردستانی خۆ كێمتر ژ رەگەزی نێر نەبینت و هەردەم هزربكت كو وێ پتر ژ زەلامی هێز و شیان هەنە،داكو بگەهتە هیڤی و ئارمانجێن خۆ.
ژلایێ خۆڤە پارێزەر”سالار فائز”دبێژت:”ژنا ئێزدی ل هەموو قۆناغێت ژیانێ هەبوونا خۆ سەپاندیە ل سەر كەتوارێ ئەو تێدا و ل هەموو بیاڤێت ژیانێ دا،ژنا ئێزدی مل بملێ زەلامی خەبات و بزاڤ كریە و هەڤركی ل گەل ژیانا سەخت و دژوار و ژ نەمانێ بەرەف هەبوونێ و ژ هەبوونێ بەرەف دیاربوونێ و دیرۆكا مە بەلگەیە ل سەر ڤێ چەندێ،ژنا ئێزدی ل هەر قۆناغەكێ بەشداری سیاسەتێ بوویە بۆ نموونە (خەنسا خان)بەلێ رەوشا نۆكە یا عێراق تێدا ژی ژنا ئێزدی رۆلەكێ كاریگەر لەیزتیە ل بوارێ سیاسەتێ دا بۆ نموونە (سیڤێ كچا بابێ شێخ،ڤیان دەخیل،نادیا موراد)پشتی كارەساتا شنگالێ ڤیان دەخیل كارەكێ باشكر و دەنگێ ئێزدیان گەهاندە گەلەك جهێن جیهانێ وەكی پەرلەمان و دادگەها و كۆنگرا،بەلێ پشتی هنگی نادیا موراد هات پتر دەنگێ ئێزدیا گەهاند ب تایبەت گرتیا ژبەر ئەوێ پتر داعش دیتن و ل گەل وان ئێش و ئازارا ژیا و هەتا داویێ خەلاتێ بالیۆزا نیازپاكیێ یێ نەتەوەێن ئێكگرتی وەرگرتی”.
پارێزەری دیاركر:” ل هاتنا داعشێ ب گشتی ژنا ئێزدی خەبات و بەرخودانكریە وەك پێشمەرگەی بەرەڤانیكریە یان خوارن بۆ سەنگەرێن شەری بریە یان ب هەلبەستێ و سترانا ورەیا پێشمەرگەی بلند كریە،هەروەسا هەر ئێك ژ نادیا موراد و ڤیان دەخیل و دوتسێنێ چەند خەلاتێن جیهانی وەرگرتن،بەلێ هێشتا گەلەك مافێن وان ماینە وەك ئازادكرنا هەموو گرتیا و دەستپێكرنا ژیانا وان ل شنگالێ و مافێ خووندنێ و ساخلەمیێ و چەندین مافێن دی دڤێت بێنە دابینكرن بۆ ژنا ئێزدی”.
تُتاح هذه الصورة أيضا في: کوردی