ئێزدی پێتڤی ئێكرێزیێ و گۆتارەكا ئێكگرتی نە بۆ داهاتیێ خۆ
خالد خدر
پشتی كو دەڤەرا شنگالێ تووشی هێرشەكا دڕندە و هۆڤانە بووین ژ ئالییێ چەكدارێن رێكخراوا تیرۆرستییا بناڤێ دەولەتا ئیسلامی ل عێراق وشامێ (داعش) ،دئەنجامێ ڤێ هێرشا هۆڤانەیا تیرۆرستێن داعش جڤاكێ ئێزدی تووشی مەزنترین زیان بوو ، ب هەزاران هاتنە كوشتن و رەڤاندن وزەلام هاتنە كوشتن و ژن و زارۆك هاتنە سەبیكرن و كچ وژن وەك جارییە هاتنە فرۆتن ل بازارێن مووسل و رەقایێ ،ژبلی زیانێن مادی و ئابووری كو دەڤەرێن ئێزدیان ژێرخانەیا وێ یا ئابووری هاتە ژناڤبرن ب تایبەتی ل شنگالێ و باشیك وبارزانێ (بەحزان) ، ودەڤەرێن ئێزدیان تووشی خرابكرنێ و تالانكرنێ بوون ژئالیێ چەكدارێن داعش ڤە، كو هەر كار وكریارەكا نە مرۆڤایەتی و دوور ژ رەوشت و یاسا ورێسایێن مرۆڤایەتی ل دژی ئێزدیان هاتنە ئەنجام دان ، وئەگەرا سەرەكی یا ڤێ هەموویێ ئەو دراوسێن ئێزدیان بوون ب تایبەتی هندەك هۆزێن ئەرەب وسوننەیێن شنگال وتلەعفەرێ ئەنجامدەرێن سەرەكی بوون ل تاوانێن هاتینە كرن ل دژی ئێزدیان.
هەژی یە بێژین كو وان ئەو كار وكریار ئەنجام دان ل دژی ئێزدیان ب تایبەتی رەڤاندن وسەبیكرن و فرۆتنا كچ وژنا ، كو ب مەرمێن خۆ یێن رەگەزپەرستیا كۆرە دەستدرێژی لسەر كچ وژنا كرن ب تایبەتی لسەر زارۆكێن كچ ، تشتێ سەرەنج راكێش وجیێ سەرسۆرمانێ ! كو هەتا نهۆ هیچ تاوانبارەك یان ئالییەك ژ وان نەهاتیە گرتن یان سزادان وب تایبەتی پشتی ژناڤچۆنا داعش ل مووسلێ پتریا وان بووینە ئاوارە و خۆ ددەنە دیاركرن وەك بێ گونەه ونهۆ ل كەمپادا درونشتینە پشتی ریهێن خۆ تراشین و ب سەدان زارۆكێن ئێزیان یێن كچك دناڤ خێزانێن خۆدا ڤەشارتینە وزمانێ دەیكێ ژبیرا وان برینە ، ئێزدی تووشی پاكرنا نەژادی بوون و گەلەك نەمابوو ئەو بێنە ژناڤبرن ،ئەو چەندا هاتی كرن ل دژی وان تاوانەكا هەرە مەزن بوو كو نەهاتیە سەرێ هیچ مللەتەكی دی ب تایبەتی دڤی سەردەمێ نوو دا، ب كورت وكورمانجی ئەوا هاتی سەرێ ئێزدیان دئێتە هژمارتن جینۆساید،چنكو ئێزدی وەك ئایینەك وپێكهاتەكا رەسەن و دێرین ل دەڤەرێ كو رەهوریشالێن وی دزڤرتە بەری هەزارێن سالان پێش زایینی ،وجیێ مخابنیێ یە دانپێدان ب جینۆسایدا ئێزدیان نەهاتیە كرن ب شێوەكی فەرمی،ژ ئەنجامێ وێ هێرشا هەنێ ئێزدی كەتنە لبن گەف ومەترسییا نەمانێ و هەرسكرنێ كو تووشی مەگەرساتەكا هەری مەزن بوون ل دیرۆكا خۆدا ، كو ژبلی كوشتن و رەڤاندن وسەبیكرنا كچ وژنا نهۆ ب سەدێن هەزارا ئاوارەنە ل ناڤ كەمپان دا وكۆچكرنا ئێزدیان بۆ ئەورۆپا ژی هێشتا بەردەوامە كو پتریا وان تەخا لاوانە ، وتشتەكی دی یێ مەترسیدار پشتی ئازادكرنا شنگالێ ب تەمامی خەلكێ وێ نكارن بزڤرنە ڤە ب تایبەتی پشتی هێرشا حەشدا شەعبی لسەر دەڤەرێن كوردستانی و شنگال ئێك ژ وان دەڤەرایە ،نهۆ ئاخا شنگالێ هاتیە دابەشكرن دناڤبەرا هێزێن سەرب پەكەكێ ڤە وهێزێن حەشدا شەعبی دا.
ئیرۆ ئێزدی د رەوش و بارودۆخەكی دژوار دا دەرباس دبن كو ئایندە وپاشەرۆژا ئێزدیان كەفتییە د مەترسییەكا ئێكجار مەزن دا ، ئێزدی پێتڤی ئێكرێزیێ و گۆتارەكا ئێكگرتی نە بۆ داهاتییێ خۆ و دووبارە زڤراندنا باوەریێ بخۆ و ڤەكرنا لاپەرێن نوو داكو رابنە سەرخۆڤە وبرینێت وان ساخ بنەڤە ، تشتێ هەری گرنگ و فەر بۆمە ئێزدیان كو دەڤەرێت مە بێنە ئاڤەدانكرن داكو خەلكێ مە بزڤرتە ڤە سەر جیێن خۆ و ئاوارەی ب داوی بێت.
تُتاح هذه الصورة أيضا في: کوردی