ئێزدی و كورسیكا كۆتایێ ل پەرلەمانێ عێراقێ
ئەمین شەمۆ
وەكو یا دیار پشتی ژناڤچۆنا رژێما گۆربگۆ ل سالا (2003)ێ دەستوورەك و پەرلەمانەك ژبۆ گەلێ عێراقێ هاتە دانان، ئەڤ پەرلەمانە ژی پێكهاتبوو ژ هژمارەكا كورسیكان وهەروەسا دناڤا ڤێ پەرلەمانی دا سیستەمێ كۆتایێ ژبۆی كێمینەیێن ئایینی و نەتەوەیی هاتە دانان كو ئێزدی ژی دناڤ دا تنێ ئێك كورسیكا كۆتایێ یا ئێتیم بۆ ئێزدیان هاتە دانان ئەڤە ژ ئێك ژمەزنترین غەدر و خیانەتە و ئێكە ژ وان غەدرێن ئێك ل دووڤ ئێكێ ل مێژوویا سیاسیا عێراقێ ل هەمبەری ئێزدیان هاتی كرن، نزا لگۆری چ پیڤەری تنێ ئێك كورسیكا كۆتایێ یا ئێتیم ژبۆ ئێزدیان هاتیە دانان.
هەتا نهۆ ئەڤە چار خۆل ژهەلبژارتنێن پەرلەمانێ عێراقێ دەربازبوون ل هەر چار خۆلان دا ئەڤ كورسیكا كۆتایێ ئەگەر بوویە كو ئێزدی هژمارەكا زۆرا دەنگان ژدەست بدەن و دەنگێن وان بهەدەر بچن ژبەر ململانێ و هەڤركیا پارت و لایەن و رێكخراوێن ئێزدیان لسەر كورسیكا كۆتایێ یا ئێتیم كو ب بۆچۆنا جادا گشتی یا ئێزدیان تنێ دەنگێن ئێزدیان دئێنە بهەدەردان و هەر ئەو كورسیك یا مسۆگەرە ئەگەر ئێك كاندید ژی هەبت و ئێك دەنگی ژی بینت، ل ڤان هەلبژارتنێن ڤێ جارێ یێن پەرلەمانێ عێراقێ ئەوێن ل (12/5/2018) هاتینە ئەنجام دان ئێزدیا دیسان ب هەمان شێوە و هەمان شاشیێن خۆ یێن كەڤن دووبارەكرن وچەندین پارت و لایەن و رێكخراو و گرۆپێن ئێزدی هەڤرك و ركابەریا ئێك و دوو دكرن ژبۆ ب دەستڤەئینانا ڤێ كورسیكا كۆتایێ كو ئەڤێن ل خوارێ نە(بزاڤا ئێزدی ژبۆ چاكسازیێ و پێشكەفتنێ دوو كاندید هەبوون،پارتا پێشڤەرۆیا ئێزدی دوو كاندید هەبوون، پارتا ئازادی و دیموكراتیا ئێزدی( (PADÊ دوو كاندید هەبوون)،هەروەسان ژبلی ڤان هەرسێ پارتێن ئێزدی كو (6) كاندید هەبوون ژبۆ ب دەستڤەئینانا ڤێ كورسیكا كۆتایێ لگۆری پێزانینێن گەهشتینە دەستێ مە هەروەسا كەسەكی دیتر یێ ئێزدی ئەو ژی هەڤرك بوو كو ژلایێ گرۆپێ (شۆرەشا گەنجێن ئێزدیان ) ڤە پشتەڤانی لێ دهاتە كرن و ئەڤ كەسە دناڤا لیستا پارتا ئێزدیا دیموكرات دا خۆ كاندید كربوو.
ژبەرڤێ چەندا مە لسەری دیاركری باشترین چارەسەری ژبۆ ڤێ كورسیكا كۆتایێ ئەوە چنكو پەرلەمانتار و كەسایەتیێن ئێزدی یێن سیاسی و جڤاكی و ئایینی و چینا رەوشەنبیرا ب گشتی ل ڤان هەرسێ خۆلێن دەربازبووی یێن پەرلەمانێ عێراقێ نكارین چ فشارا بێخنە سەر سەرۆكاتیا پەرلەمانێ عێراقێ و لژنا یاسایی یا پەرلەمانی و حكومەتا عێراقێ كو دەستكاری ل هژمارا كورسیكێن كۆتایا ئێزدیان دا بێتەكرن وهەر چاوابت ل گۆری هژمارا ئاكنجیێن ئێزدی ل عێراقێ كۆتایەك ب ئێزدیان بێتە دانان، لەورا باشترین رێكە چارە ئەوە هەر چاوابت و بهەر حالی هەبت تەڤایا ئەڤ پارت و لایەن ورێكخراو و گرۆپێن ئێزدی ببانە ئێك دەست وئێك ئارمانج وتنێ كەسەك و كاندیدەكی ژێهاتی و هەژی ل ناڤا جڤاكا ئێزدی هاتبا دەست نیشانكرن كو كاریبا ل دەرهەقێ ئێش و ئازارێن گەلێ ئێزدی و ب رێیا ڤێ كورسیكا كۆتایێ خزمەتا گەل و جڤاكا ئێزدی بكت، نە وەكو هەر پارت و لایەن و رێكخراو و گرۆپەكی هەبت هژمارەكا كاندیدان هەبت وهەڤركیێ و ململانێ لسەر ڤێ كورسیكێ بكن و هژمارەكا زۆرا دەنگێن ئێزدیان بهەدەر و بەلاش بچن.
تُتاح هذه الصورة أيضا في: کوردی