كۆچبەری و دەربەدەری
دلڤین خەلەف
ئاوارەبوون و كۆچبەری دیاردەكا خراب و كاریگەرە لسەرانسەری جیهانێ و دئێتە هەژمارتن ئێك ژ گیروگرفتێن مەترسیدار دناڤا هەر كۆمەلگەهەكێ دا و كارتێكرنەكا ئێك جار مەزن و خراب ل پشت خوەڤە دهێلە،گەلەك جاران رەوشا كۆمەلایەتی یا جڤاكێ سڤیل بەرەف هەرفاندنێ دبە و وەكە نەخۆشیا شێرپەنجێ دكەڤە دناڤا لەشێ مرۆڤایەتیێ دا و دبە ئەگەرێ شكەستنا هەستێ بەرزێ هەر كۆمەلگەهەكا پێشكەفتی و خودان هێز و ئیرادە.
بێگۆمان دەستپێكا پەیدابوونا هەر دەربەدەریەكێ ژ چەند ئەگەرێن سەرەكینە و ئێك ژوان ئەگەرێن هەرە كاریگەر ژی بێ دەستهەلاتیا گەلێن هەژار وبندەستە و نەبوونا و رێگریا ئازادیا جڤاكی یە دناڤ كۆمەلگەها وان دا و ئەڤ چەندە ژی دبە ئەگەر كو ئەو جڤاكە ببە قوربانیا بەرژەوەندیێن تایبەت یێن گەلەك ژ وەلاتێن پێشكەفتی و خودان هێز و شیان،زۆر جاران ئەڤ دیاردە ژ ئەگەرێ كێم زانەبوونێ دناڤ جڤاكێن پێشكەفتی دە ژی پەیدا دبە و ئەو جڤاكە ژی ئازادیا خۆ ژدەست ددەن و ژیانا كۆمەلگەها خۆ بەرەف رەوشەكا خراب ڤە دبەن و ئەڤ چەندە ژی ژ كۆمەلگەها وان رە دبە كارەسات و مالوێرانی و كارتێكرنا مەزن ل هەموو بوارێن ژیانێ دكە و ئەوی جڤاكێ بەرەف چارەنڤیسەكێ نەدیار دبە،هەروەسا ل داویا سەدسالیا دەربازبووی دە ژئەگەرێ ئالۆزیا رەوشا دەڤەرێ و نەمانا ئەمنیەتێ و نەبوونا ئارامیێ زۆر ژ خەلكێ رۆژهەلاتا ناڤەراست مالێن خۆ چۆلكرن و وەلاتێن خۆ بجهـ هێلان و بەرێ خۆ دانە وەلاتێن رۆژئاڤایی و داخوازا پەنابەریێ ژ وەلاتێن ئەورۆپی كرن و بوونە كۆچبەر، ئەڤێ چەندێ ژی كارتێكرنەكا خراب لسەر بارێ كۆمەلایەتیێ خەلكێ عێراقێ ب گشتی و كوردستانێ ژی بجهـ هێلا و ب مخابنی ڤە هەتا نهۆ ژی هیچ رێگری لڤێ چەندێ نەهاتیە كرن و كۆچبەری یە بەردەوامە،سەرەرای ئەوان هەموو كێشە و ئاریشێن ژبۆ خەلكێ دروست بووین پێخەمەتی ئەڤێ دیاردا خراب.
هەروسا ب مخابنی ڤە خەلكێ شنگالێ ژی لدەمێ هێرشا دوژمنێن مرۆڤایەتیێ هۆڤێن رێكخراوا تیرۆرستێن داعش ڤە هاتیە سەر باژێرێ وان و فرمانەكا گران بسەر جڤاكا ئێزدی دە راكرین وهەولێن نەمان و قركرنا وان یا ئێك جاری داین و ب هەزاران كەچ وژن و زارۆكین وان ئێخسیر و بن دەست كرین، وخەلكێ باژێری ب گشتی دەربەدەر بووین و تووشی مالوێرانیەكا مەزن بووین و وارگەهێ باب و كالێن خۆ بجهـ هێلاین و كەفتینە دەر وكۆلانا و بووینە ئاوارە و ژیانەكا پری زەحمەتی دناڤ خیڤەتگەهان دا دەربازكرین و دبەردەوامن لژێر وێ دەربەدەریێ،لەوما ئەڤێ چەندێَ ژی كارتێكرنەكا خراب لسەر رەوشا وان یا كۆمەلایەتی كر و لاوازیەكا بەرچاڤ ئێخستە سەر ژیانا وان یا رۆژانە و كێشە و ئاریشێن جڤاكی بۆ وان دروستكرینە،هەروەسا رەوشا وان یا جڤاكی ژی بەرەف ئالۆزیەكا خراب ڤە بریە و بەلەنگازی و شەپرزەیی ب رەنگەكێ بەرچاڤ دناڤ وان دا پەیداكریە و هەر ژبەر ڤان ئەگەران بارێ دەروونی یێ رێژەكا زۆر ژ جڤاكی بەرەف خرابیەكا مەزن ڤە بریە و ب تایبەت رەوشا ئافرەتا شنگالێ ئالۆزكریە،ژبەركو بارگرانیەكا مەزن كەفتە سەر ملێن وێ ژ هەموو رەخێن ژیانێ ڤە و یا ناچار بوویە خۆ لبەر زەحمەتیا هەموو ئاستەنگیان بگرت و بەردەوامیێ بدەتە ژیانا رۆژانە یا خێزانێ و ب قەدەرا خۆ رازی بە.
ژبەر ڤێ چەندێ ئەم هیڤیدارین هەموو هەول و بزاڤ ژبۆ وێ چەندێ بكەڤنە كار كو ب زووترین دەم جڤاكا مە یا شنگالی ڤەگەرێ سەر مال و ملكێن خۆ،هەر وەكو جاران ژیانا خۆ یا ئاسایی دوور ژ دەردەسەریێ ببە سەر و ئەڤ نەخۆشیا لسەردەمێ ئاوارەبوون و دەربەدەریێ بسەر وان دا هاتی ژبیر بكن و كۆمەلگەهەكا ساخلەم و سەركەفتی ئاڤابكن و بەرەف پاشەرۆژەكا گەش و ژیانەكا خۆش ڤە پێنگاڤان ژبۆ ئاڤەدانكرنا شنگالەكا نوو ب هاڤێژن.
تُتاح هذه الصورة أيضا في: کوردی