ئۆغەرا تە بخێر بت شێخێ هێژا و لێزان و خودان هەلویست
مەهدی حەسەن
نەبێژە بۆری بەسە ئەزێ خلاس بم ،كەد و خزمەت و خەباتا تە چوو جار ژ ناڤ مە خلاس نابت،هەتا ئەم د ساخبین دێ توو دنیڤا دلێ مەدا ژی و گیانێ تە دێ رەقیب بت لسەر كار و خزمەت و خەباتا مە یا لالش كو هەڤپشكە دگەل رێبازا پارتی و بارزانی، دلنیابە گۆتن و هەلویست و هش و بیرێن تە دێ بەرنامێ مە یێ كاری بن ژبۆ كوردستانەكا ئازاد ئێزدیخان تێدا گەشەبت،ژبەركو كەسەرا تە كوردستان و مللەتێ تە یێ پەریشان و دەربەدەر بوو شنگالا وێران و تەپەسەر بوو و ڤەگەراندنا كچ و ژنێن ئێخسیر بوو،لەوما ئیرۆ ئەم دبێژین كۆڤانا ژ دەستدانا شێخ شامۆیێ كوردپەوەر،كەڤران دهینیتە گرین هێشتا گەلەك زووبو ژبۆ وەغەرا شێخی، بەلێ قەدەرا تە ئەڤە بوو بەلێ دبێژین سەرفەراز هەرە وەغەرا تە یا خێرێ بت رێورەسمێن خاك سپاردنا تە دیدەڤانن كا چەند خەلك لبەر ڤێ بەفرێ و سڕێ و سەقایێ سار راوەستیان ب سەعەتا و ژبۆ تە دوعا دكرن و برۆندكێن چاڤا و قیری و گازی پێشوازیا جنازێ تە دكرن شێخێ من دلنیا بە ئەگەر تە ب چاڤێ خۆ ئەڤ جۆش و خرۆشە لسەر زەهمانێ مەم شڤان دیتبا دا توو ڤێ وەغەرێ هەلبژێری ژ دەنگێ دەف و شەبابا دەنگێ قەول و قەسیدا گۆتارێن سەركردایەتیا پارتی ژ دانانا تاچەگولینێن هەڤال و دۆستا ژ هەموو جیا د هاتن ئەم هەموو مەندەهۆشی ڤێ حەز و ڤیانا مللەتی بین ژ هەموو پێكهاتێن كوردستانێ ژبۆ تە هەی بەهشتی.
دلنیابە شێخێ من مللەت ژ تەی رازی بوو دێ خودان ژی ژ تەی رازی بت ل هاوارا تە وێ بێت،ژبەركو توو كەسەكێ دلپاك و خودان بیروباوەر بووی دگەل ئۆل و وەلاتێ خۆ تە درێغی نەكر هەتا داوی ساتە وەختێ تە خاتر خاستی ئەڤە ژی بەرسڤا گەل و وەلات بوو ژبۆ تە، كو ئەڤە بتر ژ بیست رۆژان خەلكێ مەی تەنگەزار و پەریشان ژبۆ چارەسەریا شێخێ مە و ڤەگەریانا وی ژبۆ ناڤ مەیدانا سیاسی و جڤاكی و رەوشەنبیری،بەلێ فەلەكێ چەرخا خۆ لێ دا و نەهێلا ئەم پێكڤە شادبین و بگەهین ئارمانجێن خۆ یێن نەتەوەی و نیشتمانی ل رۆژا 18ی كانوونا دووێ ئەڤ خەبەرا دلتەزین گەهشتە مە مال ئاڤایكرنا تێكۆشەر و كوردپەروەرێ مینا شێخ شامۆی خوسارەتەكا مەزن بوو بۆ كوردستانێ ب گشتی وتایبەت جڤاكا ئێزدی،ژبەركو ڤی مرۆڤێ مەزن و ژێهاتی هەموو دەمێ خۆ تەرخان كربوو ژبۆ خزمەتا مللەتی و پرەك بووی دناڤا جڤاكێ ئێزدی ودەستهەلاتێ دا ژبۆ گەهاندنا دەرد و داخوازیێن ئێزدیان،ب راستی كەد و خەباتا وی ژبۆ ناساندنا ئێزدیاتیێ و گرێدانا ئۆل و كوردایەتیێ بۆ هەتا هەتایێ دێ ل بیرا كوردستانیان بت،بنگەهێ رەوشەنبیریێ لالشێ و گۆڤار و بەلاڤۆكێن ڤی دەزگەهی شاهدێن وینە لبەر خودێ و گەلێ وی نە.
شێخ شامۆ كەسایەتیەكێ نیشتیمانپەروەر و دیار و ژێهاتی یێ ئێزدیان بوو،و خزمەتەكا بەرچاڤا دۆزا گەلێ كوردستانێ كریە و هەردەم بەرەڤانێ ماف و داخوازیێن كوردێن ئێزدی بوو و رۆلەكێ گرنگ د پاراستن و خورتكرنا پێكڤەژیانا ئاشتیانە هەبوویە،ژبەر ڤی رۆلێ بەرزێ شێخی ژبۆ جارا ئێكێ حكومەتا ویلایەتێن ئێكگرتی یێن ئەمریكا دئێتە سەر خەتێ و سەرەخۆشیێ بۆ وەغەرا داویێ یا شێخ شامۆ رادگەهینت وەك كەسەكێ ئێزدی رۆلەكێ گرنگ گێرا بۆ بەرەڤانیكرن ژ خەلكێ ئێزدی ل عێراقێ و هەرێما كوردستانێ و دبێژن ئەم هەڤپشكێن خەما بنەمالا شێخ شامۆ و هەڤال و جڤاكێ ئێزدینە ئەڤ راگەهاندنە جیێ سەرفەرازیا مە ئێزدیایە ئەمریكا سەرەخۆشیێ ل كەسەكێ ئێزدی بكت ئەڤ چەندە ژی ژ بۆشایەتیەكا ڤالا نەهاتیە ئەگەر شێخی خزمەتەكا بەرچاڤ و دیار نەكربا ئەڤ چەندە مەحال بوو بەلكی نەبەس ئەمریكا ئەگەر بەرێ خۆ بدەینە پەیاما سەرۆك بارزانی و سەرۆكێ هەرێمێ و سەرۆكێ حكومەتێ دگەل سازیێن نافخۆیی دبێژن شێخ شامۆ كەسایەتیەكێ كوردپەروەر و نیشتیمانپەروەر بوو خزمەتەكا گەلەك ژبۆ دۆزا خوشك و برایێن ئێزدی و پێكڤەژیانێ و ئاشتەوایی كریە و ژ دەستدانا وی خوسارەتەكا مەزنە.
ئەگەر بەحسێ ژیانناما رەحمەتی بكەین دەمەكێ درێژ دڤێت لەوما بتنێ دێ ئاماژە ب هندەك قۆناغێن خەباتا وی كەین چ پشكداریا وی لسەرهەلدانا بەهارا سالا 1991 ێ یان وەك پێشمەرگەهەكێ چەلنگ ل سەرێ كەبكیێ حمدئاغا و دۆلا بالیسان و بەرەڤانیكرن ژ ئاخ و وەلاتی و پشتی ئەو شەرێ هاتیە فەرزكرن لسەر پارتی شێخ وەك قارەمانەك دگەل كەس و كارێن خۆ لبەر سنگێ نەیارا سەكنی و بەرەڤانی ژ پارتی و بارزانی دكرن بۆ ماوێ هەفت سالا چەكێ شەرەفێ هلگرت وەك پێشمەرگەهەكێ چاڤ نەترس لسەرێ چیایێن كوردستانێ ل خزمەتا پارتی و بارزانی دا بوو،لەوا پشتی ئازادیا عێراقێ وەك ئەندامێ لیژنا شێوەردارێ حكومەتا هەرێما كوردستانێ هاتە راسپاردن و چەندین پرۆژە و خزمەت و دامەزراندن د رێیا ڤێ لژنێ هاتن ئەنجامدان ل سەرتاسەری جیێن ئێزدی لێ دئاكنجی،ژبەر ڤی رۆلێ وی یێ بەرز و بەرچاڤ پشتی سالا 2013 وەك سەرۆكێ بنگەهێ لالش هاتە هەلبژارتن و ڤان سالا كاری گەلەك كارێن هەژی ئەنجام بدەت،ژبەركو شێخ شامۆ ئێك ژ دامەزرێنەرێن بنگەهێ لالش بوو و ئەندامێ لژنا بەرهەڤكاربوو و ب هەموو شیانێت خۆ كار كریە ژبۆ پێشئێخستنا بنگەهی ژلایێ رەوشەنبیری و پەیوەندیا ڤە و رۆلەكێ كارا هەبوو ژبۆ رازیكرنا حكومەتا هەرێمێ بۆ ئاڤاكرنا بارەگایێ بنگەهێ لالش ل سەنتەرێ دهۆكێ وپشتەڤانیەكا بێ سنوور ل نڤیسەر ورەوشەنبیرا دكر وهاریكاربوو بۆ دەرخستنا گۆڤارا لالش یا ئەكادیمی وچاپكرنا پەرتۆكا وخووندنا پرۆگرامێ ئێزدیاتیێ و هەردەم كار دكر ژبۆ بلندكرنا ئاستێ نەتەوایەتی دناڤ جڤاكێ ئێزدی دا و هەلگرێ دروشمێ جەنابێ سەرۆك بارزانی بوو كو رەسەنترین كورد ئێزدینە و چەندین ئاستەنگ و رێگری ژی هاتن پێشیا شێخ،بەلێ كێم تەرخەمی نەكر وەك كادرەكێ چەلەنگێ پارتی درێژە ب خزمەت و خەباتا لالش دا.
هەروەسا شێخ وەك ئەندامێ پەرلەمانێ كوردستانێ هاتە هەلبژارتن ل خۆلا بۆری و رۆلەكێ كارا ل ناڤا هۆلا پەرلەمانی دگێرا ژبۆ بەرەڤانیكرن ژ مافێ گەلێ كوردستانێ ب گشتی و ئێزدیان ب تایبەت،ژبەر ڤێ ژیری و زانینا شێخی و دلسۆزیا وی سەرۆكێ حكۆمەتێ دەست نیشان دكت وەك راوێژكار بۆ كاروبارێن ئێزدیان ژبەر ڤان كاروبارێن وی و خزمەتا وی یا بەردەوام ب دلسۆزانە كار دكر ب خەم و كەسەرەكا مەزن،ئیرۆ ژ ناڤ مە باركر كو ئیرۆ رۆژ هەموو جڤاكێ كوردستانێ نەخاسمە ئێزدیخان داخبارن ب وەغەرا شێخی بەلێ ڤێ چەندێ شێخ شامۆی رۆلەكێ پیرۆز هەبوو د رێیا بنگەه و نڤیسینگەهێن لالش ژبۆ هاریكاری و پشتەڤانیا خەلكێ مە یێ شنگالێ ل فرمانا 2014ێ كو لدووڤ راسپاردێن وی هەموو بەرپرس و كادرێن مە یێن لالش كەتن خزمەتا ئاوارەیێن شنگالێ ب هەر رێیەكا هەبت نەخاسمە ژبۆ قوتابیێن شنگالێ كارەكێ گەلەك پیرۆز هاتە ئەنجامدان.
تُتاح هذه الصورة أيضا في: کوردی
