دان و خۆى و دانه‌بى و سمات د ئێزدیاتیێ دا
ئلیاس نه‌عمۆ خه‌تارى
دان و خۆى و دانه‌بى و سمات ژ كارێن پیرۆزن دناڤ جڤاكێ مه ئێزدیاندا،ده‌مێ شێخ یان پیر یان مجێورێ به‌ر قوبێ ب مه‌ره‌ما خرڤه‌كرنا دانى و خۆیێ ژبۆ چێكرنا سماتا جه‌ژن و هه‌لكه‌فتێن ئاینى یێن ئێزدیان ل لالشا نوورانى و ل به‌ر نیشانگه‌هـ و قوبێن باب چاك و خاسێن مه ئێزدیان ل گوند وشارۆچكه‌یان مال ب مال ل ناڤا گوندى دگه‌ریا،كه‌سه‌كێ ب سوره‌ت و ب خه‌لات و به‌رات و ب دوعا و درۆزێن ئێزدیاتیێ د چۆ دناڤا هه‌موو مالێن ئێزدیاندا و هه‌موو مال بۆ وى د ڤه‌كرى بوون ل ده‌مێ دانه‌بى و هێڤارێن جه‌ژنان ئه‌ندامێن مالێ ل جهۆركێ خه‌لات و به‌راتان زیاره‌تى دبوون و ل دۆر شیانێن خۆ دان و خۆى دكره خێر.
دانه‌بى:ئانكو راگه‌هاندن و ئاگه‌هداركرنا خه‌لكى بۆ رۆژا جه‌ژنێ و عه‌ره‌فاتێ ئانكو گه‌هاندنا په‌یامه‌كا ئاینى بوو كو سوبه‌ى رۆژه‌كا پیرۆزه و هه‌لكه‌فته‌كا تایبه‌ته و دڤێت هه‌موو خه‌لك بزانن،به‌رى رۆژه‌كێ ژ هه‌ر هه‌لكه‌فته‌كا ئایینى ل با ملله‌تێ ئێزدى دڤێتن دانه‌بى بێته راگه‌هاندن،به‌رى رۆژ بچته ئاڤا ل دانێ هێڤارى مجێورێ گوندى یان ژى زه‌لامه‌ك ژ زه‌لامێن ئایینى یان شێخه‌ك یان پیره‌ك ب ئه‌ركێ بانگـدانا دانه‌بیێ رادبت ئه‌و ژى پشتى دئێته راسپاردن ژلایێ گوندیان و ئختیارێن گوندى،ئه‌و كه‌سه ل ده‌مێ بانگدانێ دێ رابت چته سه‌ربانێ ماله‌كا هه‌ره بلند و ب پێخواسى دێ سێ ده‌نگا جاران دانه‌بیا ب ناڤێ وێ هه‌لكه‌فتێ یان وى خاسى ئه‌وێ بوویه دانه‌بیا وى بانگده‌ت،هه‌ر كه‌سێ ئێزدى ده‌نگێ بانگێ دانه‌بیێ ب گوهـ لێ دبت دڤێت خۆ پێخواس كه‌ت و په‌روه‌سته‌ى خودێ و سوارێ رۆژئاڤایێ بت و ب سه‌كنت هه‌تا مجێور ئه‌ركێ خۆ ته‌مام كه‌ت.
زیاره‌تى بوون:ئانكو سه‌ره‌دان و چۆنا به‌ر خاس و باب چاكێن مه ئێزدیان ب مه‌ره‌ما په‌روه‌سته‌بوونێ و خۆ هاڤێتنێ و دوعاكرنێ، ل ده‌مێ جه‌ژن و هه‌لكه‌فتان زیاره‌تبوون و زیاره‌تى بوون دئێنه‌كرن و ل رۆژێن نۆرمال ژى دئێنه‌كرن، ل ده‌مێ زیاره‌تبوونێ هیڤى و داخوازى ژ خودایێ مه‌زن دئێنه‌كرن و ل به‌ر ده‌رچكێن خاسان و خێر و خلمه‌ت دكه‌فته د دلێ مرۆڤى دا له‌وا مرۆڤ فتوى دانته سه‌ر ده‌رچكێت خاسان و سه‌ربران دبه‌ته وێ ده‌رێ و دكه‌ته خێر،مجێور و سه‌رده‌ریێن خاسا دوعایێن خێرێ و سلامه‌تیان بۆ وان مرۆڤان و مرۆڤایه‌تیێ دخوازن و ئاخێ ل ئه‌نیا وان دده‌ن، هه‌ر دیسان ل رۆژێن جه‌ژن و هه‌لكه‌فتان و توافێن خاس و باب چاكێن مه ئێزدیان گه‌له‌ك جاران خودان خێر ب خێرا ناڤێ خودێ و تاوسى مه‌له‌ك دێ رابن به‌ریێن خاسا سواركه‌ن و لفێن سه‌رێ قوب و هلێلا پێڤه‌كه‌ن دگه‌ل پێشكێشكرنا گوژمه‌كێ دراڤى بۆ خێرێ، هه‌ردیسان نائێته ژبیركرن ل ده‌مێ هاتنا جه‌ژن و هه‌لكه‌فتان زۆربه‌یا خه‌لكى بخۆ خێرێن هه‌مه‌جۆر دكن وه‌كى پێشكێشكرنا خێرێن مادى و خێرێن زادى بۆ فه‌قیر و به‌لنگازان.
چرا و تاوا بغورێ:ل هه‌ر هێڤارییه‌كا رۆژا چارشه‌مبوویێ دڤێت چرا بێنه هلكرن ل به‌ر هه‌موو نیشانگه‌هێن خاس و باب چاكێن مه ئێزدیان ل لالشا نوورانى و ل به‌ر هه‌موو نیشانگه‌هـ و قوبا ل گوند و شارۆچكه‌یێن ئێزدى لێ د ئاكنجى،هه‌ردیسان دگه‌ل هلكرنا چرایان دڤێت تاوا بغورێ د پێشیا چرایان دابت ئه‌و ژى ده‌ست و به‌ندێن مجێور و داى كابانیێ و خلمه‌تكارێن ئۆلا ئایینێ مه ئێزدیان،هه‌ردیسان ژبلى رۆژێن چارشه‌مبوویا ل هه‌موو رۆژێن جه‌ژن و هه‌لكه‌فتان دڤێت ل هه‌موو هێڤاریێن جه‌ژن و هه‌لكه‌فتان ئه‌ڤ كارێ هۆسا یێ پیرۆز ب رێڤه دچت و هه‌ردیسان ل رۆژێن جه‌ژنان ئه‌ڤ كاره دئێته كرن و بجهـئینان و فتیلێن خاسان و نیشانگه‌هان ل هه‌موو ده‌ران وه‌كو ئه‌ركه‌كێ ئایینى دئێنه ڤێخستن،هه‌ردیسان دڤێتن ئاماژێ پێ ب ده‌ین كو ل هه‌موو رێوره‌سمێن فه‌رمى ل په‌رستگه‌ها پیرۆزا لالش دئێنه گێران دڤێت دگه‌ل و دگه‌ل گێرانا رێوره‌سمێن سه‌مایێ چه‌قه‌لتوو بێته هلكرن دگه‌ل هه‌ر هه‌فت چرایێن چه‌قلتوێ ب فتیل و زه‌یتا پیرۆز دگه‌ل تاوا بغورێ ده‌مێ بێهنا وێ و دیكۆلا وێ وان ده‌ران تژى دكت.
سمات:خوارنا هه‌لكه‌فت و جه‌ژنێن مه ئێزدیانه(ل دۆر هنده‌ك ژێده‌ر و گۆتنێن كه‌ڤن یێن كو مه گوهـ لێ بووى و مه بهیستین،چێكرنا خوارنا نانێ سماتێ ل سه‌رده‌مێ نه‌بى برایم خه‌لیل بوو وه‌ختێ دڤیان كورێ خۆ نه‌بى سمایل بكه‌ته قوربانى بۆ خودێ،خودایێ مه‌زن نه‌هێلا و بۆرا به‌رانه‌ك ڤرێكر داكو بكه‌ته سمات ب له‌وران ئێزدى ب وێ چه‌ندێ دكه‌نه هه‌لكه‌فتا جه‌ژنا قوربانێ،ڤێجا هۆسا دئێته خۆیاكرن كو سمات ل وێ رۆژێ هاتیه چێكرن و ل رۆژا ئێكێ ژ جه‌ژنا قوربانێ و نه‌بى برایم خه‌لیل سمات بۆ جارا ئێكێ چێكریه و به‌رانێ به‌ره‌كه‌تێ كریه دناڤدا و بوویه سماته،ئه‌ڤ رێوره‌سمێن پیرۆز یێن گرێدایى ب چێكرنا سماتێ هه‌تا ئیرۆ رۆژ دناڤا ملله‌تێ مه ئێزدیان دا ب رێڤه دچن ل هه‌ر جیه‌كێ هه‌بت ب تایبه‌ت ل سبه‌یكا رۆژێن جه‌ژنان ئێزدى خوارنا سماتێ چێدكه‌ن چ ل په‌رستگه‌ها پیرۆزا لالشا نوورانى یان ژى ل به‌ر قوب و نیشانگه‌هێن خاس و باب چاكێن مه ئێزدیان یان ژى ل رۆژێن دانه‌بیێن خاسا شێخ و پیرێن سه‌رده‌ریێن خاسا ب خێرا ناڤێ خودانێ خۆ رادبن ب چێكرنا سماتێ و ل مالێن خۆ سماتێ چێدكه‌ن و مریدێن خۆ و گوندیێن خۆ داوه‌ت دكه‌نه سه‌ر خوارنا سماتێ.
س.س
تُتاح هذه الصورة أيضا في: کوردی
