تۆرا لالش
هەلبەت تهمهنێ بنگەهێ لالش ژ یێ من مەزنترە.
بەری ئەز چاڤێن خۆ ل سەر ڤێ جیهانێ ڤەکەم، کۆمەکا نڤیسەر و ڕەوشەنبیر و خەمخۆرێن ئێزدیییان ب هەناسەیهکا پڕی دلسۆزی و ب پشتەڤانییا سەرکردایەتییا کوردستانێ، خەونەکا مەزن کرە راستی، وان بنگەهێ لالش دامەزراند دا کو ببتە مەزنترین ناڤەندا ڕەوشەنبیری و کۆمەلایەتی یا ئێزدییان ئهوژی ل بن دروشمێ “لالش کانییەکا زەلالە د هوورته د ڕووبارێ رەوشەنبیرییا کوردی دا.”
ئیرۆ پشتی ٣٣ سالێن تژی خزمەت و دەستکەفت، ئەز دخوازم بەحسێ وێ وێستگەهێ بکەم یا کو ژیانا من یا پیشەیی گهۆڕی ئهوژی ڕۆژنامەیا “دەنگێ لالش”ـه.
وێستگەها ١٧ سالیێ
دەما ئەز د ژییێ ١٧ سالیێ دا، ڕۆژنامەیا “دەنگێ لالش” دەرگەهێن خۆ بۆ من ڤەکرن، وێ رۆژنامێ تەنێ هەواڵ بەلاڤ نەدکرن، بەلکو بەهرەیا من ژ فەوتانێ پاراست و نەهێلا پێنوسێ من بێ دەنگ بمینت، پشتی چەندین سالان ژ کارکرنا بەردەوام د ناڤ لاپەرێن وێ دا، ئەز ل وێدهرێ فێری ئەلف و بێیا راگەهاندنێ بووم، ئەو ئەزموونا من ل وێ ڕۆژنامێ دەستپێکری وهكر ئهز ل گهلهك دهزگههێت دیتر یێن ڕاگههاندنێ كاربكهم و داوی ژی ل کەنالێ “سەما” یێ بهردهوامم، کو ئەو ژی ب خۆ یەک ژ پڕۆژە و دەستکەفتێن هەری مەزن یێن بنگەهێ لالشە.
قوتابخانەیا پێگەهاندنا کادران
خزمەتا بنگەهێ لالش د بیاڤێ راگەهاندنێ دا دیروکییە، ئەگەر بەری ١٥ سالان رۆژنامەڤانێن ئێزدی د ناڤەندێن میدیایی دا ب تبلێن دەستان دهاتنە ژمارتن، ئیرۆ ب دەهان رۆژنامەڤانێن مە د دەزگەهێن کوردی و عەرەبی دا کار دکەن، راستی ئەوە کو پترییا ڤان کادران، قوتابیێن قوتابخانەیا “دەنگێ لالش” بوون.
ئەڤ رۆژنامەڤانە ئیرۆ بووینە پەرژانەک بۆ جڤاکێ خۆ؛ ئەوان وێنەیێن شاش یێن دەربارەی ئایین و کەلتوورێ مە راستڤەکرن و دەنگێ مە گەهاندنە ناڤەندێن بڕیارێ، ئەڤە ژی یەک ژ وان ستوونێن سەرەکی یە کو بنگەهێ لالش ل سەر هاتییە ئاڤاکرن.
د دوماهییێ دا
سلاڤ و رێز بۆ وان هەموو دلسۆزێن بههر د دامەزراندنا ڤی بنگەهی دا هەبووین، پیرۆزباهییەکا گەرم ل سەرۆک و ئەندامێن دەستەكا بلند و كارمهند و هەموو تایی و نڤیسینگەهان دکەم، ئهو کاروانێ بەری ٣٣ سالان دەستپێکری، ئیرۆ ب هێزتر لێ هاتییە و دێ هەر یا بەردەوام بت.
تُتاح هذه الصورة أيضا في: کوردی