Civata Êzîdiyên Sûriyê ji ENKSê vekişiya
Çavkanî :Rudaw
Civata Êzîdiyên Sûriyê bi daxuyaniyekê ragihand ku ew xwe ji ENKS û Dijbereya Sûriyê vedikişin.
Civata Êzîdiyên Sûriyê di daxuyaniya xwe de diyar dike, bi tevî ku ew gelekî hatine pişguhxistin jî, lê ji bo parastina berjewendiyên neteweyî û parastina yekîtiya rêzên Kurd, heta di nava ENKSê de mane.
Civata Êzîdiyan di daxuyaniya xwe de dibêje, “Di civîna Londonê de hate dîtin ku Dijbereya Sûriyê hê jî bi mêjiyê rejîma Baas nêzîkê pirsgirêkan dibe. Ol û neteweyên cuda yên Sûriyê piştguh dixe.”
Di daxuyaniyê de tê gotin ku jiber lawazbûna helwesta ENKSê ya li hember helwesta Dijbereyê, wan biryar dane ku xwe ji nava ENKSê vekişin.
Civata Êzîdiyên Sûriyê radigihîne ku ew êdî girêdayî ti biryarên Dijbereya Sûriyê û ENKSê nabin.
Hêjayê gotinê ye ku Civata Êzîdiyên Sûriyê di 16ê Hezîrana 2015ê de bûbû endamê ENKSê.
تُتاح هذه الصورة أيضا في: Kurdî
