Kurdên Êzidî ji Rojavayê Kurdistanê vedigerin Şingalê
Çavkanî : Rudaw
Kurdên Êzidî yên ku ji ber êrişên DAIŞê koçber bibûn û li kampên Rojavayê Kurdistanê akincû bibiûn, vegeriyan Şingalê.
Di encama êrişên çekdarên rêxistina DAIŞê bo ser navçeya Şingalê û deverên din ên Kurdistanî, bi sedan hezar Kurdên Êzidî ji mal û warê xwe koçber bûn û beşek ji wan li Baûşûrê Kurdistanê û beşek din jî li Rojavayê Kurdistanê bicih bûn.
Kurdên Êzidî yên ku berê xwe dabûn Rojavayê Kurdistanê, li kampa Newroz hatibûn bicihkirin.
Piştî rizgarkirina Şingalê ji aliyê Hêzên Pêşmerge ve û ewlehbûna deverê, vegera koçberên Kurdên Êzidî ji Rojavayê Kurdistanê ber bi Şingalê û Başûrê Kurdistanê dest pê kiriye.
Zêdetirî 25 malbatên koçberên ku li kampa Newrozê li Rojavayê Kurdistanê vegeriyane Şingalê û li Mezargeha Şerfedîn a Kurdên Êzidî bicih bûne.
Li gorî agahiyên Rûdawê, 100 malbatên din ên Kurdên Êzidî amadekariyên xwe kirine, ku ji Rojavayê Kurdistanê berê xwe bidin Başûrê Kurdistanê û li Şingalê û derdora wê akincî bibin.
Beşek ji koçberên Kurdên Êzidî ku ji Rojavayê Kurdistanê vegeriyane Şingalê, ji Rûdawê re ragihandin, ku rewşa wan li kampa Newroz gelek xirab bû û ew bi hêvî ne ku li Şingalê baştir bibe.
Dezgeha Xêrxwaziya Barzanî jî dest bi dabeşkirina alîkariyên pêwîst bo wan koçberên Kurdên Êzidî kiriye.
تُتاح هذه الصورة أيضا في: Kurdî