Rûhaniyê Êzidiyan: “Ewên çûne Îranê temsiliyeta me nakin”
Serokê Lijneya Rûhanî ya Êzidiyan Babeşêx, heyeta ku li ser navê Ezidiyan çû Îranê rexne kir û got: “Agahiya me ji wan tune û ew nûnertiya Êzidiyan nakin.”
Babeşêx di daxuyaniya xwe ya li ser qenala Kurdistan24ê de ragihand ku ew ji heyeta li ser navê Êzidiyan çûye paytextê Îranê Tehranê bêagah in û “Ew nûnertiya Êzidiyan nakin. Em qebûl nakin ku tu kes li ser navê Êzidiyan û bê xebera wan biaxive.”
Serokê Lijneya Rûhanî ya Êzidiyan herwiha îddia dike ku ew kesên çûne Tehranê li ser hesabê hin aliyên derveyî dixebitin û “Ewên çûne Îranê çend kesên Şengalî û Bexdayî ne. Hev girtine û çûne. Ew bi tu awayî temsiliyeta bîr û boçinên Êzidiyan nakin.”
Babeşêx destnîşan kir ku Lijneya Rûhanî ya Êzidiyan tenê nûnertiya Kurdên Êzidî dike û wiha axivî: “Divê Şengal û herêmên din ên Êzidiyan vegerin ser Herêma Kurdistanê. Min ji Serok Barzanî re jî ragihandiye ku em beşek in ji Herêma Kurdistanê û ji vê paşde gav naavêjin.”
تُتاح هذه الصورة أيضا في: Kurdî