Hikûmeta Iraqê: Bilindkirina Ala Kurdistanê li dijî destûrê ye
Rûdaw
Berdevkê Hikûmeta Iraqê Sedî Hedîsî ragihand, biryara bilindkirina Ala Kurdistanê ya li ser sazî û dezgehên Kerkûkê berovajiyê yasa û sdestûra Iraqê ye û dê hikûmeta Iraqê li gorî destûrê helwesta xwe nîşan bide.
Berdevkê Hikûmeta Iraqê Sedî Hedîsî derbarê biryara Encûmena Parêzgeha Kerkûkê ya li tevahî saziyên hikûmî de bilindkirina Ala Kurdistanê, ji Rûdawê re axivî û got; “Di vê mijarê de xalên destûra Iraqê zelal in. Hikûmeta Federalî û encûmena parêzgehên ku di çarçoveya herêmeke federal de hatine birêxistin dikarin ji bilî ala Iraqê alên xwe bilind bikin. Herêma Kurdistanê xwedan destûr, parlamento û hikûmet e. lê Kerkûk li derveyî Herêma Kurdistanê ye. li gorî madeya 36 a sala 2008ê, ti parêzgahek nikare ji bilî ala Iraqê aleke din li ser dezgehên hikûmî bilind bike.”
Hedîsî daxuyand, ku di 14 salên derbasbûyî de li Iraqê ti parêzgahekê ev mijar nevejandiye û got; “Civînên Desteya Bilind a Hemahengiyên Parêzgehan tê sazkirin, ti parêzgahek di çarçoveya herêmeke federal de nayê nirxandin. Kerkûk jî beşdarî van civînan dibe.”
Li gorî gotina Sedî Hedîsî “Mijara bilindkirina ala fermî bi tenê hikûmeta federalî eleqeder dike û civatên parêzgehan nikarin sînorê desthilata xwe derbas bikin û bi biryara xwe li ser dezgehên hikûmî aleke din bilind bikin.”
Hêjayê gotinê ye, ku Encûmena Parêzgeha Kerkûkê îro 28ê Adara 2017ê, bi piraniya dengan biryar da li ser hemû sazî û dezgehên fermî yên parêzgehê Ala Kurdistanê bê hildan.
تُتاح هذه الصورة أيضا في: Kurdî