Serok Barzanî û Muqteda Sedir sebaretî pêkanîna tifaqê pîrozbahî li hev kirin

BasNews – Serok Mesûd Barzanî û rêberê bizava Sedir, Muqteda Sedir pêkanîna Tifaqa Rizgariya Niştiman li hev pîroz kirin.

Ofîsa Muqteda Sedir ragehandiye, vê êvarê Serok Barzanî û Muqteda Sedir pêwendiyeka telefonî pêk anîn.

Ofîsê daye zanîn, di wê pêwendiyê de Barzanî û Sedir behsa pêkanîna Tifaqa Rizgariya Niştiman di navbera PDK, Sedir û erebên sunnî de û destnîşankirina kandîdên Tifaqê bo serkomariyê û serokatiya hikûmeta Iraqê kirin û bi wê helkeftê pîrozbahî li hev kirin.

Îro li Bexdayê, şandên PDK û Sedir û erebên sunnî li hev civiyan û tifaqa navbera xwe de wek Tifaqa Rizgariya Niştimanî ragehandin.

Di civîna han de kandîdê PDKê Rêber Ehmed wek kandîdê fermî yê Tifaqê bo serkomariyê û kandîdê Sedir bo serokatiya Hikûmetê jî wek kandîdê Tifaqê bo serokatiya hikûmetê hatin destnîşankirin.

Tifaq Rizgariya Niştiman wek mezintirîn firaksyona parlementoya Iraqê hat binavkirin.