Hewlêr (K24) – Serokê Herêma Kurdistanê Nêçîrvan Barzanî derbarê rêkeftina navbera Hikûmeta Herêma Kurdistanê û Hikûmeta Federal a Iraqê de peyamek belav kir û pesnê rola Serokwezîrê Iraqê û Serokwezîrê Herêma Kurdistanê da, ku bi ruhekî erênî ji bo çareseriyê, karîn bigihin hevtêgihiştin û rêkeftinê.

Îro Sêşemê 4ê Nîsana 2023an, Serokê Herêma Kurdistanê Nêçîrvan Barzanî ragihand, ew bi kêfxweşiyê ve pêşwaziyê li rêkeftina îro ya di navbera Hikûmeta Federal a Iraqê û Hikûmeta Herêma Kurdistanê de bo destpêkirina hinardekirina petrola Herêma Kurdistanê dike.

Nêçîrvan Barzanî di peyama xwe de diyar kir: “Em dupat dikin ku Herêma Kurdistanê, wek her tim, amadeye bi diyalog û li hevtêgihiştinê pirsgirêkan li ser esasê destûrê çareser bike ku di berjewendiya hemû Iraqê de ye û dibe sedema aramiya siyasî û aborî li welat.”

Peyama Serokê Herêma Kurdistanê wiha ye:

Ez bi kêfxweşiyê ve pêşwaziyê li rêkeftina îro ya di navbera Hikûmeta Federal a Iraqê û Hikûmeta Herêma Kurdistanê de bo destpêkirina hinardekirina petrola Herêma Kurdistanê dikim.

Ez rola birêz Serokwezîrê Iraqa Federal û birêz Serokwezîrê Herêma Kurdistanê bilind dinirxînim ku karîn bi ruhekî erênî ji bo çareseriyê bigihin hevtêgihiştin û rêkeftinê. Ez destxweşiyê li wan dikim.

Spas ji bo tîmên her du aliyan ku gotûbêjeke serkeftî bi rêvebirin ku berhema wê bû ev rêkeftin. Em hêvîdar in ku ew rêkeftin wek xwe bê cîbicî kirin û bibe destpêka çareserkirina pirsgirêkên din jî.

Em dupat dikin ku Herêma Kurdistanê, wek her tim, amadeye bi diyalog û li hevtêgihiştinê pirsgirêkan li ser esasê destûrê çareser bike ku di berjewendiya hemû Iraqê de ye û dibe sedema aramiya siyasî û aborî li welat.

Nêçîrvan Barzanî

Serokê Herêma Kurdistanê

4/4/2023