ئهمریكا: دێ پێگیر وان رێككهفتنان بین یێن مه د گهل پێشمهرگهی دا کرین
waar – دهوك :
وهزیرێ بهرگریا ئهمریكا ب سهرهدانهكێ ب رێیا فرۆكخانهیا ههولێر یا نێڤدهولهتی گههشته ههرێمێ و ژ ئالیێ سهرۆكێ ههرێمێ ڤه هات پێشوازیكرن.
مالپهرێ سهرۆكاتیا ههرێمێ بهلاڤكریه: ئاشتۆن كارتهر وهزیرێ بهرگریا ئهمریكا لگهل شاندهكی كو پێكهاتبوو ژ بالیۆزێ ئهمریكا ل ئیراقێ و فهرماندهیێ هێزێن ئهمریكا و ههژمارهكا بهرپرس و شیرهتكاران گههشته ههرێمێ و ژ ئالیێ مهسعوود بارزانی سهرۆكێ ههرێمێ پێشوازی لێ هاته لێكرن.
د كۆمبوونێ دا بهحس ل رۆلێ ههماههنگیا د ناڤبهرا ههولێر و بهغدا ، د شهرێ دژی داعشێ دا كر و ب ئهگهرهكێ سهرهكی یێ وان سهركهفتنان دازانین، ئهوێن هێزێن پێشمهرگهی و سوپایێ ئیراقێ لسهر داعشێ تۆماركرین.
كارتهری دا زانین ژی: گهلێ ئهمریكا پشتهڤانێ پێشمهرگهیه و پشتهڤانه ل ئۆپهراسیۆنا ژ ناڤبرنا داعشێ، ههروهسا وهلاتێ وی، دێ پابهندی رێككهفتنێن خوه بیت ئهوێن داینه پێشمهرگهی د بیاڤێ هاریكارییێن سهربازی و دارایی دا.
د ههمبهر دا سهرۆك بارزانی سوپاسیا وهزیرێ بهرگری و گهلێ ئهمریكا كر د پشتهڤانیا پێشمهرگهی ل شهرێ دژی تیرۆرێ دا و راگههاند: پێشمهرگهی د شهرێ دژی تیرۆرێ دا ئهوا لسهر خوه ب سهركهفتیانه ئهنجامدایه.
جهێ ئاماژه پێكرنێ یه، د كۆمبوونا سهرۆك بارزانی و وهزیرێ بهرگریا ئهمریكا دا و د مهراسیمهكا تایبهت دا مهدالیا ئازایهتیا وهزارهتا بهرگریا ئهمریكا ژ ئالیێ وهزیرێ بهرگریا ئهمریكاڤه ب چوار پێشمهرگهیان هات دان و د پهیڤهكا كۆرت دا، كارتهری ب وان پێشمهرگهیان را گۆت: ههوه شهرهف بۆ خوه و گهلێ خوه تۆماركر.
تُتاح هذه الصورة أيضا في: کوردی