نێچیرڤان بارزانی: ههرێم چاڤهرێیه پهكهكه شنگالێ چوول بكهت
waar – دهۆک:
سهرۆكوهزیرێن ههرێما كوردستانێ راگههاند؛ شنگال دهڤهرهكا ههستیاره و مانا پهكهكێ دێ ئالوزییان دروست كهت و حكومهتا ههرێمێ چاڤهرێیه كو پهكهكه شنگالێ چوول بكهت، كا چهوا هێزێن پێشمهرگهی، ژ كۆبانێ ڤهگهریان.
د ههڤپهیڤینهكێ دا دگهل كهنالێ بی بی سی پشكا فارسی، نێچیرڤان بارزانی سهرۆكوهزیرێن ههرێمێ گۆت: هێزێن پێشمهرگهی دێ ل ههموو وان دهڤهران مینن یێن كو رزگاركرین، لێ مانا وان دێ ب دانوستاندن دگهل بهغدا بیت و نها ههماههنگییهكا مهزن یا سهربازی دناڤبهرا ههولێر و بهغدایێ دا ههیه و پشتی 25 سالان، ههرێمێ رێ ب سوپایێ ئیراقێ دا دهربازی ئاخا وێ ببیت، لێ ڤێ جارێ بۆ رزگاركرنا مووسلێ بوو.
دا زانین ژی: ل دهمێ داخستنا پهڕلهمانێ كوردستانێ، پارتی نهچاربوو دناڤبهرا خراب و خرابتر دا، یا خراب ههلبژێریت، ژبهركو وی دهمی ئهولهویهت بۆ شهڕێ داعشێ بوو و تنێ داعش 35 كیلومهتران ژ ههولێرێ دوور بوو، لێ بۆ ئالییێن دی یێن سیاسی، ئهوهلیهت شهڕی داعشێ نهبوو، نها ژی كو شهڕ بهرهڤ داویێ یه، ئهوهلیهتا پارتی، كاراكرنا پهڕلهمانی و چارهكرنا ئالوزییێن سیاسی یه.
بارزانیێ سهرۆكوهزیر دهربارهیی ئهگهرێ شهڕێ پێشمهرگهی و حهشدا شهعبی گۆت: ههر چهندە د شهڕێ داعشێ دا حهشدا شهعبی رۆلێ خوه ههبوو، لێ پێدڤییه بهغدا و رێبهرێن سیاسی یێن شیعی، هزر د رێكخستنا حهشدێ دا بكهن، ژبهركو نها ب ئاوایهكێ سهربهخوه لڤینان دكهت و گهر وهها بیت، دبیت ل پاشهرۆژێ كێشهیێن مهزن دروست ببن.
نێچیرڤان بارزانی باسێ رۆژئاڤایێ كوردستانێ ژی كر و ئاماژهكر، ئالیهكێ رۆژئاڤا، دهرفهتا چالاكییان ب چو پارتێن دی نادهت و سیاسهتهكا دكتاتورانه ل رۆژئاڤا پهیرهو دكهت، لهو پێدڤییه ههموو ئالیێن رۆژئاڤا دهست ب دانوستاندنان بكهن و پێكڤه رێكبكهڤن.
تُتاح هذه الصورة أيضا في: کوردی