لەیلا تەعلو:شەش جاران ل سووریا هاتیمە كڕین وفرۆتن
تۆرا لالش یا راگەهاندنێ
(لەیلا تەعلو) ژنەكا رزگاربوویا ئێزدی ژ دەستێ داعش ئاشكەراكر،جیرانیێن ئێزدیان یێن دەهێن سالا ل دەوروبەرێن شنگالێ دچەند دەمژمێرا دە كچ وژنێن مە گرتن وبێ رەوشتی وكڕین وفرۆتن پێ كرن،ل سووریا شەش جاران وەك (سبیە)هاتمە كڕین وفرۆتن،پەیاما من بۆ هەموو جیهانێ داعش مەترسیە بۆ سەر هەركەسەكی ودڤێت بێتە ژناڤبرن.
(لەیلا) دگەل نێزیكی بیست كەسان ژمالباتا وێ ل 3تەباخا 2014ێ ژلایێ داعش ڤە هاتە گرتن دەمێ شنگال داگیركرین،نێزیكی 33 هەیڤا دبن كۆنترۆلا وان دابوو،بەری ماوەیەكی هاتە رزگاركرن نهۆ ل هەولێرێ دگەل رێكخراوێن بیانی وەك چالاكڤان دبوارێ مافێ مرۆڤی دە كاردكت ب تایبەتی خزمەتا ژن وزارۆكان دكت.
ڤێ رزگاربوویا ئێزدی ب ڤی رەنگی بەحسێ چیرۆكا رزگاربوونا خۆ كر،كو وەك هەر ژ دۆزەخێ دەركەفتی و بۆ رۆژناما دەنگێ لالش ئاشكەراكر،چەكدارێن داعش وجیرانێن ئێزدییا بەری چەندین سالا ل دەلیڤەكێ دگەریان كو كچ وژنێن ئێزدیا بكەڤنە دەستی وئەو جیرانییا دەهێن سالا دچەند دەمژمێرا دە هەموو ژبیركر وكچ وژنێن مە گرتن وبێ رەوشتی وكڕین وفرۆتن پێ كرن،ئەو كەسێن دەمێ ل دەستپێكێ ئەم گرتین وژن وزەلام ژێك جودا كرین ژنێت جوان وكچێن كچك ژێگرتین ونەزڤراندین هەموو خەلكێ شنگال وتەلەعفەر وبەعاج بوون،ب شەڤ ترومبێلێن باری یێن مەزن ئینان وتژی ژن و زارۆك كرن وبرنە بەعاج وبرسی وتێنی دئاڤاهیێ قوتابخانەكێ كرن،ب شەڤ كۆمەكا تیرۆرستان وەكی هۆڤا هاتن كچ وژنێن جوان وبەركەفتی ژێگرتن وبخۆ برن وژئەگەرێ وێ ئێكێ بوو قیرقیرا زارۆكا هەر بێ مفابوو،پشتی بۆرینا پێنج رۆژا ئەم ڤەگوهاستینە تەلەعفەر و ئەم ب سەدێن ژنا دئاڤاهیێ قوتابخانەكێ دە ئاكنجی كرین وئێكسەر ئەمیرێن داعش هاتن ئەوان ژی چیا ڤیا ژكچ وژنا بخۆ ژێگرت وبرن وئێكی ژوان خۆدا ناسین گۆت ئەز سووننەیێ تەلەعفەرم و دلۆڤانی ب مە نەبر،ژبەركو ئەم كورد بوین وئەم ب كافر دهژمارتین ،ئەم ل تەلەعفەر ماین وفڕۆكێن هەڤپەیمانا جیێن وان بۆمبەباران كرن، داعش خوارن نە دامە ئەوژی رۆژێ هەر ئێكی سەمونەك وپارچەكا پەنیرێ ددایێ و پتریا زارۆكا ل وێدەری نەساخ و نەخۆش بوون،هەرچیا گازندەك ژی كربا دقوتا ودبر.
دبەردەوامیا ئاخفتنا خۆ دا گۆت:پشتی هەفتیەكێ ئەم ب ترومبێلا ڤەگۆهاستینە مووسل وئەم برینە جیەكی ڤەدەر وئەم دناڤ شورهەكێ كرین ، دگەل رۆژهەلاتی ئەم برینە زیندانا بادۆش وبەردەوام فرۆكا بۆمبەبارانا ساترا دكر تا شەڤەكی هاتن ئەم ڤەگوهاستینە تەلەعفەر وئەم ل سەنتەرێ باژێری و گوندێن شیعا بەلاڤ كرین، ئەم ل گوندێ (كسر المحراب) ئاكنجی كرین،ل وی گوندی گۆتنە مە یان دێ موسلمان بن یان دێ وە كوژین ئەم ناچار بووین رازی بین دا مە نەكوژن بەلكی خۆ ژدەستا قورتال بكەین، چەند رۆژەك بۆرین ئەم ل مالێن گوندی ئاكنجی كرین من مۆبایلا خۆ دناڤ جلكێت كیژا خۆ دە ڤەشارت بوو من دەرئێخست وئەز دگەل برایێ خۆ ئاخڤیم ومن گۆتێ هەتا نهۆ ئەم ب سلامەتین،شێخەكی ئێزدی یێ بناڤ سالڤە دخانیەكی دە بوو ل جیرانێ مە خواست ئەز مۆبایلا خۆ ب دەمێ دا لگەل مالاخۆ ب ئاخڤت، من دایێ بەلێ مخابن دەمێ زڤراندی پشتی هنگی ب نیڤ دەمژمێرەكێ داعش ئەو كوشت وئێكی ژوان هێرش كرە من وگۆت مۆبایلێ بینە یان دێ گولا دتەوەركەم، ئێكسەر من زانی وان مۆبایل یادگەل دیتی وئەز ناچار بووم مۆبایلێ بدەمە وان، پشتی هنگی ب چەند رۆژەكا داعش هاتن زەلام و برایێن من برن وهەتا نهۆ من نزانی چ لێهاتن پشی چەند رۆژەكا ئەم ل كسر المحراب ماین ئەمیرەكی تەلەعفەری ب ناڤێ حەجی مەهدی هات وژن كۆم كرن وگۆت كی ژوە دێ بڤان رازی بت وەك سبیە كەس رازی نەبوو وئەم هەموو ل ترومبێلا سواركرین ومە نزانی دێ چ ل داویا مە ئێت، پشتی شوڤ وەرگەریایی چەند ترومبێلەك ژ سنوورێ سووریا هاتن ودەمێ ئەم گەهشتینە دناڤ ئاخا سووریا دە ئەو ترومبێلنە هەر ناڤبەینەكێ دسەكنین وهندەك چەكدار ل باسا سواردبوون وهەر چی كچكا وان ڤیابا بخۆ دبر ویێت ماین برنە سووریا.
هەروەسا دیاركر،سبەیكێ ئەم گەهشتینە باژێرێ رەققە ل سووریا وئەم ب سەدەها ژن وزارۆك دسەردابەكا پانزینخانەكێ كرین ئەوژی هەموو بۆریێن ئاڤێ وبەرمایكێن دوهنی بوون ، هەتا هەفتیەكێ مە قەتاند نزانم چاوە ئەم ژمرنێ ڤەرەسیاین ژبەر بێهنا پیس وغازا ژەهركری، ژنوو نەخۆشیێن مە دەستپێكر وئەم كەفتینە بەر بازارا وكڕین وفرۆتن ب مە كر ژبلی لێدانێ وكرێتكرنێ وسڤكاتیێ،لەیلایێ دووپات كر دەمێ ئەو ل سووریا شەش جارا هاتە كڕین وفرۆتن وەك (سبیە) ئەو ژلایێ سێ داعشێن عێراقی ڤە هاتە كڕین ئەو ژی ئەبو ئەنەس ئەلعێراقی وسەیف ئەلعێراقی ودكتۆر عبدللە ئەلهاشمی وسێ یێن سعودی ئەوژی ئەبو هاجر الجزراوی وئەبو جهاد وابو حەمزە الجزراوی وب زۆری ئەز لگۆر شەریعەتێ وان و ب رێیا ئەبو هانی ئەللبنانی هاتمە ماركرن.
ل داویێ ژی گۆت:پەیاما من بۆ هەموو جیهانێ داعش مەترسیە بۆ سەر هەركەسەكی ودڤێت بێتە ژناڤبرن.
تُتاح هذه الصورة أيضا في: کوردی