بنگەهێ لالش چەند بریارێن نوو دەركرن
تۆرا لالش/دهۆك
ئیرۆ شەمبوویێ 20ی تەباخا 2022،دەستەیا بلندا بنگەهێ لالش یێ رەوشەنبیری و كۆمەلایەتی ل دهۆكێ،كۆمبوونا خۆ یا ئاسایی ب سەرپەرشتیا بەرێز”سەعید جردۆ”سەرۆكێ بنگەهی و ئەندامێن دەستەیا بلند و بەرپرسێن تایان ئەنجام دا و چەند تەوەرێن گرنگ هاتنە بەحسكرن.
ل دەستپێكێ بەرێز”سەعید جردۆ”سەرۆكێ بنگەهێ لالش باسێ رۆلێ هەردوو رەحمەتیان (پیر خدر و شێخ شامۆ)كر و خواست جیێ وان بەهشت بت،لدووڤدا خواست ژڤانەك بۆ هەلبژارتنێن تایی و نڤیسینگەهێن لالش بێتە دەستنیشانكرن و دیاركر بریار هاتە دان هەلبژارتنێن داهاتی یێت تایێن لالش ل گۆر پەیرەو و پرۆگرامێ بنگەهێ لالش بن و دئازادانەبن،هەروەسا بریار هاتە دان هەر بنگەهەكی دڤێت ژ دوو ئافرەتان كێمتر نەبت و ل نڤیسینگەهان دڤێت ب كێماسی ئافرەتەك هەبت.
دتەوەرەكێ دی یێ كۆمبوونێ دا پلانا ستراتیژی یا بنگەهێ لالش دگەل تایی و نڤیسینگەهان هاتە بەحسكرن و ئەو پلان سالانە بێتە رەوانەكرن بۆ دەستەیا بلند.
سەرۆكێ بنگەهێ لالش دیاركر ژی بریار هاتە دان پەیكەرەك بۆ پیر خدر سلێمان بێتە چێكرن و پەرتۆكخانا بنگەهێ لالش هاتە بناڤكرن بناڤێ پیر خدر.
هەر دكۆمبوونێ دا بریار هاتە دان دیدارا لالش یا رەوشەنبیری بناڤێ(ئێزدی و شۆرەشا ئەیلولێ)ل رێككەفتی 11/9/2022بێتە گێڕان،هەروەسا كەڤالەك بێتە دروستكرن و ناڤێن ئەندامێن دەستەكا كەڤن تێدا بێنە هەلاویستن،زێدەباری كۆمبوونا دەستەیا بلند دگەل سەرۆكێن تایان هەیڤانە بێتە كرن.
هەروەسا ل داویا كۆمبوونێ گەنگەشە دناڤبەرا ئەندامێن دەستەیا بلند و بەرپرسێن تایان،ل سەر گرنگترین كار و بزاڤ و چالاكیێن بنگەهێ لالش دا هاتە كرن.
تُتاح هذه الصورة أيضا في: کوردی