ل دهۆكێ چار كەسان ژبەر لافاوێ گیانێ خۆ ژدەست دان
باسنيوز:
ژ ئەگەرێ پەیدابوونا لافاوێ دوهی هەتا دەمژمێر 1:30 شەڤ پتر ژ 40 خێزانێن سەنتەرێ دهۆكێ ئەوێن مالێن وان ل دەوروبەرێ رووبارێ هشكەرۆ، مالێن خوە بەردابوون و ل قوتابخانان دا هاتنە حەواندن. هەروەسا ل ناحیا فەیدیێ سەر ب قەزا سێمێلێ ڤە ئاڤێ چوار ترۆمبێل ل گەل خوە برینە و چوار كەسان گیانێ خوە ژ دەست دایە.
ل شەڤا بۆری ل دەمژمێر 1:00 شەڤ رائید بێوار عەبدولعەزیز، پەیڤدارێ رێڤەبەریا بەرەڤانیا باژێری ل پارێزگەها دهۆكێ بۆ (باسنیۆز) دیاركر، لافاوێ دوهی زیانێن مەزن ل سەنتەرێ پارێزگەها دهۆكێ و ل هندەك دەڤەرێن دەوروبەر و ل ناڤ كەمپێن ئاوارە و پەنابەران ل دووڤ خوە هێلاینە و پترترین زیان ژی ل وان مالان كەفتینە ئەوێن ل دەوروبەرێ رووبارێ هشكەرۆ ل سەنتەرێ باژێری دژین و هەروەسا ل هندەك مالێن دەڤەرا فەیدیێ كەفتینە.
ئەو یەك ژی دیار كر كو ژ ئەگەرێ لافاوا دوهی، زیانێن مەزن ب بەر خەلكێ دەڤەرا فەیدیێ كەفتینە و ئاڤێ چوار ترۆمبێلێن دەڤەرێ برینە و بوویە ئەگەرێ هندێ كو چوار كەسان ل دەڤەرا فەیدیێ گیانێ خوە ژ دەست دایە و ب ترۆمبێل ڤە ل گەل ئاڤێ چووینە و خەندقینە و هەتا نها تەرمێن وان نەهاتینە دیتن.
رائید بێوار عەبدولعەزیز خویا كر كو پتر ژ 250 خێزانێن ل بەر لێڤێن رووبارێ هشكەرۆ دژین و لافاو بووینە ئەگەر كو زیان ب پتریا وان خێزانان بكەڤن و نێزیكی 100 مالان زیانێن مەزن ڤێ كەفتینە و نێزیكی 40 مالان ژی خوە تشتەك د ناڤ مالا وان دا نەمایە و مالا وان هەموو پڕی ئاڤ بوویە و هەموو كەل و پەلێن وان ژناڤچووینە و نێزیكی 50 خێزانێن ل دەوروبەرێ رووبارێ هشكەرۆ ژی ل شەڤا بۆری ژ ناچاری مالێن خوە بەرداینە و ل قوتابخانان دا نڤستینە و ژ ترسا لافاوەكا دی، نەشیاینە ب ڤەگەرنە د ناڤ مالێن خوە دا.
ناڤبری ئاشكرا كر كو لافاو بووینە ئەگەر نێزیكی 30 ترۆمبێلێن دهۆكێ ب ئاڤێ دا بچن، هندەك ژ وان ئاڤ گەهشتیە مەكینا وان و دناڤ ئاڤێ دا ژ كاركەفتینە و 10 ترۆمبێل ژی هەر ژ ئەگەرێ لافاوان هاتینە وەگەراندن و ب دیواران كەفتینە و ب تمامی ژ ناڤچووینە و ل گەل ئاڤێ دا چووینە.
گۆتیشی: ل گەل پەیدابوونا لافاوان پارێزگارێ دهۆكێ و قایمقامێ دهۆكێ و رێڤەبەرێن پەیوەندیدار سەرەدانا مالێن زیانڤێكەفتی كریە و هەموو پێدڤیێن وان دابینكرینە و سۆز دایە وان كو هەموو بهێنە قەرەبووكرن و هەر خێزانەكا مالا خوە یا زێدەگاڤی ل بەر لێڤێن رووبارێ هشكەرۆ ب جهبهێلیت دێ ب پارچەكا ئەردی هێتە قەرەبووكرن.
بێوار عەبدولعەزیز د لێدوانا خوە دا بۆ (باسنیۆز) خویاژی كر كو تیمێن وان یێن بەرەڤانیا باژێری د ناڤا لافاوا دا شیاینە 27 هاوولاتیێن دهۆكێ ژ خەندقین رزگاربكەن و ب هەڤكاری ل گەل ئەمبۆلانسێن ساخلەمیا دهۆكێ و تیمێن هاوارهاتنێ چارەسەریێن دەستپێكی و یێن بلەز بۆ وان بهێنە كرن.
پەیڤدارێ رێڤەبەریا بەرەڤانیا باژێری ل پارێزگەها دهۆكێ ژ ئالەكێ دیڤە دیار كر كو زێدەباری ئەو زیانێن ب هاوولاتی و خێزانێن دهۆكێ كەفتین، لافاوێ زیانێن مەزن ژی گەهشتنە ئاوارە و پەنابەرێن هژمارەكا كەمێن دهۆكێ، ب تایبەت ئاوارەیێن كەمپا گەرماڤا ل شێخان و ب دەهان خیڤەتێن وان ژ ناڤچووینە.
موقەدم ئازاد تاها، پەیڤدارێ رێڤەبەریا هاتن و چوونا پارێزگەها دهۆكێ بۆ (باسنیۆز) دیار كر كو ل دەمێ پەیدابوونا لافاوێ و پشتی هینگێ ژ دەمژمێر 9 بۆ 11 شەڤێ پتریا جادەیێن سەنتەرێ پارێزگەها دهۆكێ هاتبوونە داخستن و رێ هاتبوونە گرتن و شۆفێر نەدشیان هاتن و چوونێ بكەن و ئەڤە ژی ببوو ئەگەر كو هژمارەكا روودانێن هاتن و چوونێ روو بدەن و مە ژی وەكو هاتن و چوونا بەردەوام ل رادیۆیا ترافیك یا رێڤەبەریا مە ب شێوەیەكێ ئێكسەر داخواز ژ هەموو شۆفێران دكر كەس ژ مالا خوە نەدەركەڤیت و ئەوێن ژ دەرڤە ژی ب زووترین دەم ب ڤەگەرنە مالا خوە، دا كو تووشی چو زیانان نەبن.
دهێتە زانین كو دوهی رۆژا شەمبی ل دەمژمێر 7:00 شەڤ و هەتا 10:00 شەڤ ژ بەر بارینا بارانێن زۆر، لافاو ل دهۆكێ و ل هندەك دەڤەرێن دەوروبەر پەیدابوون و ل گۆرەی پێشبینیێن كەشناسیێ پتر ژ 55 میلیمێن بارانێ باری بوون.
تُتاح هذه الصورة أيضا في: کوردی