تۆرا لالش
بنگەهێ لالش تایێ شاریا ب هەماهەنگی د گەل دەستەیا بلند یا بنگەهێ لالش ل ڕۆژا سێشەمبێ ل ڕێککەفتی 3/12/2024 ل هۆلا لالش ئێک ل کۆمەلگەها شاریا ئێڤارەکا ڕەوشەنبیری ب چەند بڕگە و سمیناران و ئیمزاکرنا ڕۆمانا سمۆیێ باپیر یا نڤیسکار عبدالرحمن بامەرنی ب ئامادەبوونا کەسایهتی و ڕۆشنبیر و خەلکێ دەڤەرا شاریا و دهۆکێ، ساز کر.
بڕگە پێکهاتبوون ژ:
1/ سمۆیێ باپیر و ڕولێ جڤاتا ڕۆحانی یا ئێزدییان د ڤەگەراندنا ڕەڤاندیاندا/ حەسۆ هورمی.
2/ هندەک ڕوودانێن فەرمانا باسییان/ داود مراد خەتاری.
3/ تەوزیفكرنا جینوسایدەكێ بۆ كارەكی ئەدەبی د گەل ئیمزاکرنا ڕۆمانێ/ عبدالرحمن بامەرنی.
پشتی بخێرهاتنا ئامادەبوویان، بڕگەیێن سمینارێ دەستپێکرن و نڤیسکار و ڤەکۆلەر داود مراد خەتاری بەحسێ هندەک ڕوودانێن گرنگ یێن هەقیقی یێن فەرمانا باسییان کرن و گۆت فەرە ئەڤ ڕووداننە ببنە ئەرشیف و دۆکیۆمێنتکرن و تەکەزی ل نڤیسینا وان ڕوودانان کر، ل پشتڕا ژی چالاکڤان و نڤیسکار حەسۆ هورمی بەحسا ڕۆلێ سمۆیێ باپیر و جڤاتا ڕۆحانی یا ئێزدییان کر د ڤەگەراندنا ڕزگاربوویێن ئێزدیدا و گۆت، کارەکی دیرۆکی بوو بابێ شێخ بڕیارا پەسەندکرنا ڕزگاربووییان کری و ب کارەکی ئەرێنی ل قەلەمدا، پاشان نڤیسکارێ ڕۆمانێ عبدالرحمن بامەرنی بەحسا نڤیسینا ڕۆمانا خۆکر کا بۆچی نڤیسی و چاوا و بۆچی سمۆیێ باپیر کرە کارەکتەرێ خۆ یێ سەرەکی د ڕۆمانێدا.
پشتی هنگی ژی دەرگەهێ دانوستاندنێ هاتە ڤەکرن د ناڤبەرا ئامادەبوویی و پانەلیستاندا و پسیارێن وان ب هێمنی و دلڤەکری هاتنە بەرسڤدان.
ل داوییێ ژی ڕۆمان بێبەرانبەر هاتە دابەشکرن ل سەر ئامادەبوویان و هاتە ئیمزاکرن ژ ئالییێ نڤیسکاریڤە، جهێ ئاماژێیە ئەڤ ئێڤارە ژ ئالیێ ساکار کامل ڤە هاتبوو بڕێڤەبرن.
تُتاح هذه الصورة أيضا في: کوردی