گەلۆ مرۆڤێ كورد چاوا خۆ ناسی؟
جوان عزەت
گەلۆ مرۆڤێ كورد چاوان خۆ ناسی؟ ئەرێ ناسین ب تنێ ئەوە تاك لسەر رێنمایێ بەرامبەر بێتە ناسین؟ یان ژی ئەوە كو بزانت پەروەردەیا ناسینا وی چیە! واتە ئەگەر بێن بەحسێ هندەك تیورێن ناسینێ بكەین، هینگی دێ بۆ مە خویا بت كو مەرەم ژ خۆ ناسینێ ئەو بوویە، هەر دكەڤن دا هەتا قۆناغا ئیرۆ تاكێ كورد پێداچۆن دهەبوونا خۆ دا نەكریە و ل دەروون، ئەقل و هەبوونا خۆ نەگەریایە ئانكو ناسین ب تنێ وەك مرۆڤێ بەرێ و ئەز و توو ناسیە،لەورا ئەڤێ چەندێ ژی بتنێ سروشت، نزمی، بلندبوون و مەزهەرێ مرۆڤان دا ناسین.
ل ڤێدەرێ هۆسان خویا دبت بنەمایێن هزری و خۆ ناسینا چ كەسان، جیەكێ جێگیر و نەگهۆری نینە بەلكو كەسایەتیا مرۆڤی، هەموو دەمان د گهۆرینێن بەردەوام و دروستبوونا جەوهەرێ ژیانێ دا بوویە، ئەڤە ژی ئیرادا كۆمەلگەه، كەسی، مەعریفی و دەستهەلاتێ بەشداری رێرەوێن دروست دكت،شۆپنهاوەر فەیلەسوفەكێ ئەلمانی بوو بەرسڤا خۆ ناسینێ ددەت و دبێژت:د وەختەكی دا بوو پرسیارێن ئازاری ل بەرسڤەكێ دگەریا، دەمەكی دچتە سەر جادەیێ نێزیكی باخچەیەكی دبت و ل ناڤ وی باخچەی دا دروونت بەرێ خودانێ بۆ گولان دكت، ئێك ژ كەسێن وێ دەڤەرێ داخازێ ژ پۆلیسان دكت،دەمێ نێزیكی شۆپنهاوەری بووی ب شێوەیەكی بێ رێز دبێژتێ توو كی؟ شۆپنهاوەر بەرسڤا ئەفسەری بڤی شێوەی ددەت دبێژت: ئەگەر هوون بكارن هاریكاریا من بكن، بۆ وێ چەندێ بەرسڤا ڤێ پرسیارێ ب دەست من بكەڤت دێ هەتا هەتا سوپاسداربم. ل ڤێدرێ واتە، پرۆسسا خۆ ناسینێ و دروستكرنێ، هەموو دەمان پرۆسسەكا بێ فشار و ئازاد گرێدایی تاكی ب تنێ نینە، بەلكو دەزگەه و سازیێن حكومی، دیسان سالوخەتێن گوند و عەشیرەت و نەتەوە و…هتد د پرۆسسا خۆ ناسینا تاكی دا پشكدارن،ئەڤە ژی ئێك ژ خالێن لاوازیێ نە ل نك تاكی، چنكو باندۆرا هەری زێدە دكەتە سەر ئەدائا هزرا مرۆڤی.
بنێرە گاڤا كو تاك لسەر رێیەكا دی تر هات پەروەردەكرن، هینگی هزرا وی یا تەڤاهی ب شێوەیەكی زەحمەت بێت گهۆرین،ژبەركو ئەو دئێتە سەپاندن لسەر بیرۆكەكا نەرێكخستی و دوور ژ ئەكتیڤا هزرا زانستی و خۆ دگەل ئەقلێ تەڤاهی دگونجینت،ل ڤێدەرێ پرسیارەك خۆ نیشا مە ددەت، گەلۆ مرۆڤ دێ كەنگی خۆ هشیار بینن؟ ئەرێ ئەم دكارن پرس و پێشهاتێن مرۆڤبوونا خۆ سەلمینن؟ دیارە پرسێن جڤاكی و ئامرازێن رێیان نەبووینە ئالاڤێن باش، ژبۆ سەرهەلدانا ئاستێ تاكێ رۆژهەلاتی،لەورا هەتا نهۆ نكاریە لگۆر دەمێن گونجای ژیان و خۆ ناسینێ وەكو پرۆسێسا گەردوونی دگەل جەوهەرێ خۆ پێناسە بكن.
ئەنجام: دبت ژیان ل نك مە ب رێیەكا نەپێگیربووی هاتبتە سەرەدەركرن، بەلێ ئەڤە وێ واتایێ ناگەهینت ئەم هێشتا ل قۆناغێن داخستی دا بن،بەلكو پێتڤیە پرسا دەربارەی ئەتیك، رەفتار و خۆ ناسینێ ل نك خۆ هندا نەكەین و ل راستیا وێ بگەرن، داكو ئێدی بزانین فەرهەنگ و هەڤناسكرنا مە دكارت ئیدارەیا پێشكەفتنا مە بكت.
تُتاح هذه الصورة أيضا في: کوردی