بنگەهێ لالش:پرۆژە یاسایا دادگەها تاوانێن داعشێ ل كوردستانێ گاڤەكا مەزنە ژبۆ دادمەندیا ئێزدیان
_داخوازێ ژ خەلكێ خۆ یێ زەرەرمەند و هەمی شۆلەژێ یا دكەین ب هەمی شێوەیان بەلگەیان كۆمڤە بكن ژبۆ شەرمەزاركرنا تیرۆرستێن سەردەمی
ب گرنگیدانەكا مەزن ڤە، مە ئیرۆ بینەریا روونشتنا جڤاتا وەزیرێن حكوومەتا هەرێما كوردستانێ یا بەرێز كر،كو تێدا پرۆژە یاسایا دادگەها تاوانان یا تایبەت ب تاوانێن داعشێ ل هەرێما كوردستانێ هاتە پەسەندكرن،لدووڤ دا بەیاننامەك ژلایێ رێزدار مەسروور بارزانی سەرۆكێ حكوومەتا هەرێما كوردستانێ ڤە هاتە بەلاڤكرن و دیاركر كو ئەو یاسا دێ بتە گاڤەك ب ئاراستەیا سزادانا تاوانباران و ئینانا دادپەروەرییا زێدەتر بۆ سزادانا تیرۆرستێن سەردەم یێن داعشێ ژبەر تاوانێن ل دژی كوردێن ئێزدی و پێكهاتان ژ ئنتیمایێن جودا جودا یێن ئایینی و نەتەوەی ل دەما دۆرێن سێیەكا عێراقێ ل ناڤەراستا سالا 2014ێ كۆنترۆلكری،دگەل دا دەڤەرێن ئێزدیان ل شنگالێ كو تاوانێن هۆڤانە و كرێت بگرە ژ كوشتن و دەستدرێژی و كەنیزە و دزین و تالانكرنا كەلوپەلێن خەلكی و شێواندنا مەزارگەهێن پیرۆز زێدەباری گرتنا ب هەزاران كو هێشتا چارەنڤیسێ وان بێ سەروشوونە هەتا ئیرۆ رۆژ.
بێگۆمان پرۆژە یاسایا دادگەها تاوانكارییا تایبەتمەند ب تاوانێن داعشێ ئەوا حكوومەتا هەرێمێ پەسەندكری ئێك ژ گاڤێن مەزنە ژبۆ دادمەندیا ئێزدیان ب شێوەكی تایبەت،چنكو ئەم دوێ باوەریێ دا بووین كو تۆلڤەكرن ژ تیرۆرستێن داعشێ هەر دێ رۆژەكێ ئێت،و ئەم دڤێ مژارێ دا ب تەڤاهی گرێدایی سەركردایەتی و حكوومەتا هەرێما كوردستانێ بووین،كو تاكە پشتەڤانێن راستەقینەیێ یێن ئێزدیانە،كو دەملدەست كار ژبۆ دامەزراندنا نڤیسینگەها رزگاركرنا گرتیێن ئێزدی كری و ب مەردانە بوودجەیەك مەزاختی ژبۆ قورتالكرنا ب هەزاران گرتیێن ئێزدی ژ دەستێن هۆڤێن داعشێ،سەرباری قەیرانا دارایی یا هەرێم ڤەگرتی ژبەر ئەوا بەغدا ل وی دەمی كری كو پشكا هەرێمێ ژ بوودجەیا ئتیحادی بری.
بەیانناما سەرۆكێ حكوومەتا هەرێمێ(ئەوا ل خوارێ دانەیەك هاتی یە) ب شێوەكی رۆن و ئاشكرا نیازا حكوومەتا هەرێمێ پیشان ددەت بۆ دادگەهكرنا داعشێ ژبەر تاوانێن دژی ئێزدیان ب تایبەت،و دژی پێكهاتێن دیتر یێن گەلێ عێراقێ،و ئەم ڤێ بەیاننامێ وەكو بەلگەنامەیەكا دیرۆكی ل قەلەم ددەین دچارچۆڤێ دژە تیرۆر و توندرەویێ و رێگریێ ل دووبارەنەبوونا هەر هەوەكا كۆمكوژیا بكۆم ل دژی ئێزدیان و پێكهاتێن ئایینی و ئەتنیكی،و ئەم پشتگیریەكا بهێز و رۆن ل گشت پێكهاتێن كورردستانێ دناڤا رێزێن ڤێ بەیاننامێ دا دخوونین،وێ چەندێ پشت راست دكە كو كوردستان پەناگەها ئارامی یا داویێ یە و كەلها داد و وەكهەڤیێ یە،و قوربانیدانا پێشمەرگەی ژ دەما بزاڤ و شۆرەشێن رزگاریخوازا كوردستانێ ب هەروە نەچۆیە.
هەروەسا ئەم داخوازێ ژ گشت خەلكێ خۆ یێ زەرەرمەندبووی ژ تاوانێن تیرۆرا داعشێ،و دخوازین دام و دەزگەهێن پەیوەندیدار و تەڤایا گرنگیپێدەر دڤی بواری دا بەلگەنامەیان كۆم و دكیۆمێنت بكن كو هەر جۆرە بەلگەیەك بت چ ڤیدیۆ یان وێنە یان نڤیسین یان نامەیێن داعشێ بن،ب ئارمانجا پێشكێشكرنا ڤان بەلگەنامەیان بۆ ڤێ دادگەهێ كو هیڤیخوازن پەرلەمانێ كوردستانێ پرۆژەی پەسەند بكت وەك ئەركەكێ نشتیمانی ب زووترین وەخت،ژبۆ ئینانا تۆلڤەكرنەكا دادپەروەرییانە بۆ هەر ئێكی پشكدار و هاریكاربووی ل ئەنجامدانا تاوانێن هۆڤ و كرێت دژی ئێزدیان و دژی پێكهاتێن دیتر.
دەستەیا بلندا بنگەهێ لالش یێ رەوشەنبیری و جڤاكی/دهۆك
28ی نیسانا 2021
تُتاح هذه الصورة أيضا في: کوردی