بریكارێ دیوانا ئەوقافێ بۆ ڕۆژناما دەنگێ لالش:دپرۆژە بوودجەیا 2023 دا غەدرەكا مەزن هەمبەر ئایین و كێمینەیان هاتیە كرن
تۆرا لالش:
بریكارێ ئاینی و ڕەوشەنبیری ل دیوانا ئەوقافا ئاینێن مەسیحی و ئێزدی و سابئە و مەندایان ل بەغدا ئاشكەراكر،دچارچۆڤێ پلانا ساڵا2023دا چەندین پرۆژە دووبارە ئاڤەدانكرنا مەزارگەهان و دروستكرنا هۆلێن ئاینی پێشكێشكرینە،لێ ئەو بوودجەیا بۆ دیوانێ هاتیە تەرخانكرن گەلەك یا كێمە و مەزنترین نادادپەروەری و غەدرە ل هەمبەری ئایین و كێمینەیان دا هاتیە كرن.
داسن سلێمان سفو، بریكارێ ئاینی و ڕەوشەنبیری ل دیوانا ئەوقافا ئاینێن مەسیحی و ئێزدی و سابئە و مەندایان ل بەغدا بۆ دەنگێ لالش دبێژت:وەكو هەموو دزانن دەڤەرا شنگال و دەشتا نەینەوا تووشی كرێترین تاوان و تالانكرنێ بوون دەما تیرۆرستێن داعش دەست بسەرداگرتی ل ساڵا2014 و هەموو مەزارگەهێن ئێزدیان و هۆلێن ڤان مەزارگەهان یێن تایبەت خێر و شەران و هەلكەفتێن ئۆلی هاتنە پەقاندن و ژناڤبرن، ژبەر نەگرنگیدانا حكومەتا بەرێ یا عێراقێ بۆ دووبارە ئاڤەدانكرنا ڤان مەزارگەهان كو یا پێتڤی بوو دوی دەمی دا بوودجەیا تایبەت بۆ هاتبا تەرخانكرن ژ بوودجەیا هاوارهاتنێ،لێ پشتی ماوەیەكی درێژ و بێ ئەنجام خەلك نەچاربوون دووبارە دەست ب نووژەنكرن و ئاڤەدانكرنا وان مەزارگەهان بكەن ل سەر كیستێ خۆ بێ كو پشت بەستنێ ل سەر حكومەتێ بكەن،هەتا ئیرۆ ڕۆژ ژی هێشتا هندەك مەزارگەه ل شنگالێ وێرانكرینە و وەكی خۆ ماینە،ئەم ل دیوانا ئەوقافا ئایینان چەندین پرۆژە دچارچۆڤێ پلانا ساڵا2023دا پێشكێشكرن،ژوانژی دووبارە ئاڤەدانكرنا مەزارگەهان و دروستكرنا هۆلێن ئاینی و خێر وشەران ل شنگال و شێخان و ئەلقووش و هندەك پرۆژە ل باشیك و بەحزانێ.
ئەو یەك ژی ئاشكەراكر،ئەو كوژمێ بۆ دیوانێ یانكو هەر سێ ئایینان هاتیە تەرخانكرن دچارچۆڤێ بوودجەیا 2023دا كو تەنها پێنج و نیڤ ملیار دینارن،بڤێ چەندێ ئەم مەندەهۆش بووین چنكو تێرا كوژمێ وان پرۆژەیێن بەردەوام ناكەت یێن ل سالێن بۆری كار ل سەر هاتیە كرن،لەوا بڤێ چەندێ نكارین چوو پرۆژەیان دئیسالە دا ئەنجام بدەین،ل بەرامبەردا بوودجەیا دیوانێن شیعە و سوونەیان نێزیكی 700ملیار دینارانە،ئەڤ بخۆ دبتە مەزنترین نادادپەروەری و غەدرە ل هەمبەری ڤان ئایین و كێمینەیان دا هاتیە كرن.
داسن سلێمان دووپاتكر،ل سەر پەرلەمانتارێن ئێزدی ل جڤاتا نوونەرێن عێراقێ بلەز پێنگاڤان پاڤێژن ل سەر لژنەیا دارایی ل پەرلەمانی،بۆ هندێ بوودجەیا دیوانێ بێتە زێدەكرن،داكو بكارین هندەك پرۆژەیان دئیسالە دا بۆ خەلكێ خۆ ل شنگال و شێخان و باشیكێ ئەنجام بدەین.
تُتاح هذه الصورة أيضا في: کوردی
