بارزانی: چ وەلاتەکێ زلھێز دژاتییا رێفراندۆمێ نەکرییە
WAAR-دهۆک:
سەرۆکی ھەرێما کوردستانێ رادگەھینیت؛ تا نھا چ زلھێزێن جیھانێ دژاتییا خوە بۆ رێفراندۆما سەرخوەبوونا ھەرێما کوردستانێ نەکرییە.
مەسعوود بارزانی د ھەڤدیتنەکا خوە یا مالپەرێ فۆرێن پۆلێسی یێ ئەمریکی دا ب درێژی باسێ رێفراندۆما چاڤەرێکرییا سەرخوەبوونا ھەرێما کوردستانێ کرییە و گۆتییە: رێفراندۆم بۆ سەرخوەبوونا کوردستانێ یە و دێ د دەما خوە دا ھێتە کرن، تا نھا ژی چ وەلاتەکێ زلھێز دژاتی نەکرییە بەلکو تنێ دەما وێ ب نەگونجای ب ناڤ کرینە کو ب باوەرا وان دێ گرفتان ل دەڤەرێ زێدە کەت.
د وێ دیدارێ بارزانی باسێ قۆناغێن پشتی رێفراندۆمێ کرییە کانێ ھەرێما کوردستانێ دێ چ گاڤەکێ ھاڤێژیت، رێفراندۆم ل ناوچەیێن کوردستانی، ھەروەسا ھەلوەستێ وەلات و زلھێزێن جیھانێ و وەلاتێن ھەڤسوو ئەگەر ھات و دۆرپێچ دانا سەر ھەرێمێ.
وار دەقێ وێ دیدارێ ژ زمانێ ئێنگلیزی وەکو خوە وەرگێرایە:
ئێف پی: ژڤانێ رێفراندۆمێ ھاتییە دەستنیشانکرن، پشتی دیارکرنا وی ژڤانی ھوون د گەل سەرۆکوەزیران عەبادی ئاخڤتینە، کارڤەدانا وی چ بوو؟
بارزانی: راستە، بەری نھا ژی مە ئەڤ مژارە دگەل عەبادی گۆتوبێژ کرییە، من تایبەت بۆ باسکرنا رێفراندۆمێ پەیوەندی پێ کر و بۆ شرۆڤە کر کو رێفراندۆم پرسەکا ئاسایی یە و مافێ قانوونی یێ گەلێ مەیە، ھەروەسا من بۆ رۆن کر کو پشتی رێفراندۆمێ دێ ئەنجامان د گەل گۆتوبێژ کەین ب رێیەکا ئاشتییانە، ئەوی تێگەھشتن بۆ ھندێ ھەبوو، من گۆتێ کو ئەم دخوازین مژارێ چارە بکەین ب رێیا ئاشتیێ نە توندوتیژیێ، وی تێگەھشتنا خوە نیشان دا و ب ئەرێنی ل مژارێ نێری.
ئێف پی: تە دیار کر کو ھەر گاڤەکا بەرەڤ سەرخوەبوونێ دێ د چارچووڤێ دانوستانان د گەل بەغدایێ دا بیت، د وان دانوستانان دا، دێ ب کێمتر ژ سەروەرییەکا تەمام رازی بن؟
بارزانی: رێفراندۆم بۆ سەرخوەبوونێ یە، ئەو پرسیار دێ ژ خەلکی ھێـتە کرن و خەلک دێ بەرسڤێ دەت.
ئێف پی: ئەڤ رێفراندۆمە نە د چارچووڤێ بەرسڤدانا سیستەمێ سیاسی یێ ناڤخوە و دەرڤە یە، دێ شێی بێژی کاریگەرییا وێ دێ چ بیت؟
بارزانی: مژارا رێفراندۆمێ ل دۆر چارەنڤیسێ گەلەکی یە، لەو ئەڤ مژارە ژ ھەر چارچووڤەکێ سیاسی یان حزبی مەزنترە، یان ھەر ئارێشەیەکا د ناڤبەرا پارتێن سیاسی دا، ئەزێ پشتراستم کو پڕانییا خەلکێ کوردستانێ دگەل رێفراندۆمێ دانە، پشتەڤانێن پارتێن سیاسی ژی پڕانییا وان دگەل رێفراندۆمێ دانە، مە کۆمبوونەکا ئەرێنی د گەل ھەموو پارتان ھەبوو و ھەموو پشتەڤانییێ لێ دکەن.
“بارزانی: پشتی رێفراندۆمێ دێ گۆتوبێژێن جودابوونێ دگەل بەغدا دەستپێکەین”
ئێف پی: تۆ باس ل خواستەیێن گەلێ کورد دکەی، ئەرێ ترس ھەیە کو رێفراندۆم بێی چارچووڤەیەکا فەرمی سەرخوەبوونێ ب دەستڤە بینیت؟
بارزانی: رێفراندۆم بۆ وەرگرتنا بۆچوون و دەستوورییا گەلی یە، بۆ نیشاندانا حەزا گەلی بۆ ھێزێن ناڤخۆ و دەرەکی، پشتی خەلک بڕیارێ ددەت، وەک من گۆتی دێ ئێکسەر دانوستانێن جددی و ئاشتییانە د گەل بەغدایێ دەست پێ کەین بۆ بجھئینانا خواستەیا مللەتی ب تەمامی. رێفراندۆم بۆ سەرخوەبوونێ یە، لەورا من دڤێت ھەموو تێبگەھن کو ھەردەما مە دیالۆگ دەست پێ کر، ئەم دەست ژ بجھئینانا خواستەیا خەلکی بەرنادەین، ئەڤجا رێفراندۆم بۆ سەرخوەبوونێ یە و پێدڤییە ئەنجامێن وێ بھێنە بجھئینان.
“بارزانی: رێفراندۆما ئەڤسالە دێ ژ یا ٢٠٠٥ێ جودا بیت”
ئێف پی: ل سالا ٢٠٠٥ێ ژی رێفراندۆمەک ھاتبوو کرن، ٩٨%ێ ب ئەرێ دەنگ ھاتبوو دان لێ سەرخوەبوونا کوردستانێ بدەستڤە نەھات، دێ رێفراندۆما ڤێ جارێ چاوا یا جێاواز بیت؟
بارزانی: رێفراندۆما ٢٠٠٥ێ ژ ئالیێ رێکخستنێن جڤاکا سڤیل ڤە بانگەشە بۆ ھاتبوو کرن و ھاتبوو رێکخستن، لێ ئەڤە یا فەرمی یە ژ ئالیێ حکومەت و پارتێن سیاسی ڤە یە، ئەڤە دێ ھێتە ھەژمارتن یا دی نەوەسا بوو.
ئێف پی: ھەوە ھاریکاری ژ بسپۆرێن قانوونیێن نێڤدەولەتی وەرگرتییە بۆ رێفراندۆمێ کو ب جۆرەکی بیت کاریگەرییەکا مەزنتر ھەبیت ڤێ جارێ؟
بارزانی: بۆ چەندین سالە ئەم کار دگەل پسپۆرێن نێڤدەولەتی و پسپۆرێن قانوون و سیاسەتا نێڤدەولەتی دکەین، بۆ وێ یەکێ ھاریکارییا مە د ڤێ ئارمانجێ دا بکەن، چ پێ نەڤێت گەلەک ھاریکارییا مە کرییە.
“بارزانی: ئەگەر رێفراندۆم زێدەتر گیرۆبیت دێ زیانێ بینین”
ئێف پی: مادەم چەندین سالە تو د گەل وان گۆتوبێژێ دکەی، بۆچی تە نھا ھەلبژارت بۆ رێفراندۆمێ؟
بارزانی: دەمەکێ درێژە ئەز گەھشتیمە وی ئەنجامی کو یا فەرە رێفراندۆم بھێتـە کرن و رێ ب خەلکی بھێتە دان بڕیارا خوە بدەن، ھەروەسا بەری دەمەکێ درێژە ئەز گەھشتیمە وێ باوەریێ کو بەغدا ھەڤالبەندییەکا راست و برایانە د گەل مە نەڤێت، ئەم ناخوازین وەسا رازی ببین کو ببینە پاشکۆیێن وان، ئەڤە بۆ رێگرتنێ یە ژ ئارێشەیەکا مەزنتر و ژ شەڕەکێ خویناوی و تێکچوونا ئێمناھییا ھەموو دەڤەرێ.
لەورا دخوازین ڤێ رێفراندۆمێ بکەین و ژ خەلکی بپرسین وان چ دڤێت، ئەو یەک دێ ھاریکار بیت کو رێ ل ھەر نەئارامییەکا پاشەرۆژێ و شەڕی بگرین، گەر رەوش بەردەوام بیت. تو رەوشا دەڤەرێ دزانی، دەمێ خەلک بڕیارێ ددەت د رێفراندۆمێ دا، ئەم دخوازین ھەموو ئالیێن دی رێزێ ل خواستەیا دیمۆکراسی و ئاشتییانە یا خەلکێ کوردستانێ بگرن.
دا بەرسڤا تە بدەم کا بۆچی نھا و نە بەری نھا، ژبەر رەوشێ ب گشتی ل دەڤەرێ، ژبەر پێشڤەچوونێن دی مە پاشخست، لێ ئەگەر پتر پاشبێخین، د بەرژەوەندییا خەلکێ مەدا نابیت و دێ کاریگەرییەکا خراب ل سەر چارەنڤیسێ خەلکێ مە ھەبیت، لەو نھا باشترین دەمە بۆ وێ رێفراندۆمێ.
ئێف پی: رەخنەگر دبێژن کو نھا رەوشا ئابۆری یا ھەرێما کوردستانێ باش نینە، دشێت ھندەک ژ مووچەی بدەت، لێ باوەرییا وەبەرھێنەران یا لاوازە و رەخنە د ناڤخوە دا ھەنە کو رێفراندۆم بەری کاراکرنا پەڕلەمانی یە، و ماوەیێ سەرۆکاتییا تە بەری دو سالا ب سەرڤەچوویە، بۆچی سەرخوەبوون ژ ڤان ھەموو پرسان گرنگترە؟
بارزانی: ئەگەر ئەم ل ھیڤییا رەوشەکا بێی کێماسی بین و ھەتا ھەموو ئارێشە بھێنە چارە کرن، ئەڤە روو نادەت، ئەم دخوازین رێفراندۆمێ بکەین دا سەربخوە بین، ئەڤە دێ ھاریکارییا مە کەت کو ئۆتۆماتیکی گەلەک ئارێشەیان چارە کەین.
ئەگەر تو ل نموونەیا وەلاتێن دی بنێری ئەوێن کو ل دووڤ سەرخوەبوونێ چووین، ھەمووان ئارێشەیێن خوە یێن ناڤخوە ھەبوون، وان خوە ل ھیڤییا چارەکرنا وان ھەموو ئارێشە و ناکۆکیێن ناڤخوە و دەرەکی نەگرت. ئەم ژی خوە ل ھیڤییا وێ یەکێ ناگرین کو چارە بۆ ئێک ب ئێکە ژ ئارێشەیان بگرین، ئەڤە ژ وان ئارێشەیان مەزنترە، ئەم دێ نھا کەین و پاشی وان ئارێشەیان چارە کەین.
“بارزانی: رێفراندۆم دێ رێکێ ل نەئارمییەکا مەزن گریت”
ئێف پی: دێ زڤڕمە وێ یەکێ کا دێ ئەڤ رێفراندۆمە چ دەتە کوردان، ژ ئالیێ تەکنیکی ڤە، ھەتا نھا ھەژمارەکا ھێزان ب ئاشکرایی بزاڤ کرییە رێفراندۆمێ ب نەقانوونی نیشان بدەن بەری بھێتە کرن، ئەمریکا دژە و تورکیا ژی یا رۆن بوویە و ب نەبەرپرسیارانە و شاشییەکا مەزن ب ناڤ کرییە، ئەڤجا ئەو رێفراندۆمە دێ چ ھێز و ھەژمۆن ب ھەوە دەت کو وە ھەتا نھا نەبیت؟
بارزانی: مە گەلەک بۆ ئێکگرتنا ئیراقێ کار کرییە، ئەز دشێم پەیوەندییا مە د گەل بەغدا دا ل سەر دو قۆناغا دیار کەم، قۆناغا ئێکێ د گەل دروستکرنا دەولەتا ئیراقێ ل دەمێ شەرێ جیھانییێ ئێکێ دەست پێ کر ھەتا ٢٠٠٣ێ، یا دوێ پشتی ھنگی و ھەتا نھایە.
ل سالا ١٩٢٠ێ ھەتا ٢٠٠٣ێ پشکا کوردان ژ حوکمی چ بوو؟ ئەنفال، ھێرشێن کێمیایی، وێرانکرنا گوندێن مە، گۆڕێن بکۆم، کۆمکوژی، ئەو بەھرا کوردان بوو د پەیوەندیێن د گەل بەغدایێ دا.
پشتی ٢٠٠٣ێ پشکا کوردان چ بوو؟ بڕینا بودجەی و نەپێگیریکرن ب دەستوورێ ئیراقێ ژ ئالیێ وان ڤە، ئەڤجا پرسیارا مە بۆ ئەمریکا و وەلاتێن دی: دڤێت ئەم چ تشتێ دی بکەین، مە گەلەک زەحمەت بر بۆ دروستکرنا دەستووری بۆ ئیراقێ کو گەرەنتیکەرێ ماف و ھەڤپشکییا مە ھەمووان بیت، مە دەنگ پێ دا، د دەستوورێ ئیراقێ دا نڤیسییە کو ئێکگرتنا ئیراقێ گرێدای بجھئینانا دەستووری یە. پرسیارا من بۆ وان ئەوە: دەستوورێ ئیراقێ ھاتییە بجھئینان. ھەلبەت نەخێر.
لەورا ب نێرینا من و ب نێرینا زلھێزێن جیھانێ، چ ژ وان نەگۆتییە ئەو دژی رێفراندۆمێ نە، ئەو دبێژن کو چێدبیت نە دەمەکێ گونجای بیت، یان ئارێشەیان چێکەت، من جیاوازی د گەل وان ھەیە ل سەر ھەردو خالان. ئەو یەک ئارێشەیان زێدە ناکەت، ئەگەر رێفراندۆم نەھێتە کرن، نەخوەجھییا پەیوەندییان دێ زێدە بیت، و نەئارامی دێ ل دەڤەرێ پتر بیت، ئەم دخوازین رێفراندۆمێ بکەین دا رێ ل وێ نەئارامییا چاڤەڕێکری بگرین.
ئەگەر ئەو وەلاتێن خۆدان بڕیار ل دژی رێفراندۆمێ بن، ل وی دەمی دێ ل دژی بنەمایێ خوە ب خوە بن، کو ئەو ژی مافێ راست و دیمۆکراسییانە یێ خەلکی یە بۆ بڕیاردانا چارەنڤیسێ خوە، دژاتییا وان بۆ رێفراندۆمێ دژایەتیکرنا دیکمۆکراسیێ یە.
ئێف پی: سەرباری وێ، وان نێرینا خوە ھەیە، ئابۆرییا وە ب جۆرەکی یە کو ھین پشت ب جیرانان دبەستن، ھەوە پلان ھەیە ل سەر جیرانێن خوە بۆ نموونە تورکیا بسەرکەڤن؟ مە بەری چەندەکێ دیت چ ب سەرێ قەتەرێ ھات دەمێ جیرانێن وێ دۆرپێچ دانایە سەر، ئیرانێ ب فڕۆکەیان خوارن بۆ بر، ھەوە پلان ھەیە ئەگەر رەوشەکا وەسا د گەل ھەوە ژی چێبوو کو ھین بشێن بەردەوام بن و د دۆرپێچێ دا ل سەر ھەڤپەیمانێن خوە بسەرکەڤن؟
بارزانی: مخابن، نھا بەرژەوەندی بەری بنەما و رەوشت و مرۆڤاتیێ ھەیە د پەیوەندییان دا، بۆ نموونە ئارێشەیا قەتەرێ، ئەو وەلات ب پشتەڤانیکرنا تیرۆرێ دھێتە سووچبارکرن، نھا تو دبینی ئەو چاوا پشتەڤانیێ بدەستڤە دئینن، ئەڤ مژارە یا جودایە، ئەو دۆرپێچێ دداننە سەر قەتەرێ و ئەگەری بۆ پشتەڤانیکرنا وێ بۆ تیرۆرێ ڤەدگەڕینن، لێ بۆ مە، ئەم شیاین دربەکێ مەزن ل تیرۆرێ بدەین، مە خوین دا بۆ ژناڤبرنا تیرۆرێ. خوەش دەلیڤە یە ئەز نھا ڤێ داخۆیانیێ ب تە و جیھانێ بدەم، بۆ مە خۆشترە ئەم ژ برسان بمرین نەکو د بن زۆرداری و داگیرکاریێ دا بژین، ئەگەر بڕیار برێیا رێفراندۆمێ بیت و ئەو دۆرپێچێ داننە سەر مە بلا ئەم بمرین، دێ جیھان چ بێژیتە خوە کو ھێلای مللەتەک ژ برسان بمریت ژبەرکو دخواست ب رێکێن دیمۆکراسییانە چارەنڤیسێ خوە دیار بکەن.
“بارزانی: مە ھزرا ھەر رەوەشەکێ کرییە”
ئێف بی: تو ب باوەری کو گەل دۆرپێچێ قەبوول بکەن؟ ژ ١٩٩٠ێ ھەتا نھا گەلەک پرس ھاتینە گوھۆرین، ھەوە پەیوەندی د ناڤبەرا کورد و جیھانێ دروست کرینە، ھەوە فڕۆکخانە ئاڤاکرینە، ھەوە مۆلێن مەزن دروست کرینە، تە باوەرە مللەتێ کورد دێ رازی بیت د رەوشەکێ دا بژین یاکو تو ل سالا ١٩٩٠ێ دا تێدا ژیایی؟
بارزانی: مە ھزرا ھەموو پرسەکێ کرییە، ئەڤە گرێدای ئیرادە و دەنگێ خەلکی یە، خەلک تێدگەھیت کو ئەو دێ چن بڕیارا خوە دەن، نەدوورە ئەو ب نەخێر دەنگی بدەن، ل وی دەمی ئەو بەرپرسیارییا مە یا دیرۆکی نابیت، لێ ئەگەر ب ئەرێ دەنگ بدەن ئەو رامانا وێ یەکێ ددەت کو گەل یێ ئامادەیە بچن و ھەموو ترسەکێ قەبوول بکەن.
تە بەحسێ فڕۆکخانەیان کر، ھەتا نھا ژی، دەستھەلاتا ھێلێن ئاسمانی یا سڤیل ل ئیراقێ، ژبەرکو باوەری ب فێدرالیێ و ھەڤپشکییا ھاتووچوویا ئاسمانی نینە، دەما فڕۆکەیەک ژ ئەورۆپا یان ھەر وەلاتەکێ دی دھێت، ئەو دشێن رێ ل دادانا وان بگرن، چ جۆرێ دەستھەلاتێ و چ جۆرێ دەولەتێ ئەو ھێز ھەیە؟
ئێف پی: ئەگەر ئەز درست تێگەھشتبم، ئەڤ رێفراندۆمە دێ ھێتە کرن و ھوون دێ وەک شەرعییەت بۆ گۆتوبێژان دگەل بەغدا بۆ جودابوونی ژ ئیراقێ بکارئینن، ئەرێ پەڕلەمانێ ئیراقێ دێ ئیمزایێ ل سەر رێککەفتنەکی کەن کو گوھۆڕینەکا بنەرەتی د پەیوەندیێن بەغدایێ دگەل ھەرێما کوردستانێ دا بھێتە کرن؟
بارزانی: دێ دانوستانان دگەل وان دەست پێ کەین، لێ ئەو ئارێشەیا وانە کا بگەھنە رێککەفتنەکێ یان نە، لێ د بیاڤێ دژە تیرۆری دا دێ ھەڤکارییا خوە د گەل دا بەردەوام کەین و دێ ھەڤکاریێ د ناڤبەرا پێشمەرگەی و سوپایێ ئیراقێ دا زێدە کەین، ئەوا دشیان دا بیت دێ کەین.
ئێف پی: دێ ھەلوەستێ تە چ بیت گەر د گەل عەبادی نەگەھشتییە چ رێککەفتنان و نەشیای وی قاییل بکەی ل دۆر سەرخوەبوونێ؟
بارزانی: گەلەک زوویە وەسا بێژین، ھێشتا رێفراندۆم نەھاتییە کرن، مە گەلێ خوە یێ ھەی و ھەروەسا پارتێن مە یێن دی یێن سیاسی و سەرکردەیێن دی ھەنە کو پێدڤییە راوێژێ د گەل دا بکەین، ئەڤە بڕیارا من بتنێ نینە.
“بارزانی: بەغدا ب ئاشتییانە رازی نەبیت مە رێکێن دی ھەنە”
ئێف بی: لێ تو یێ دلگران نینی کو بەغدا ھەلوەستەکێ دی ھەبیت؟ ھەروەک ل سالا ٢٠١٤ێ نیشان دای ل دەمێ مژارا سەربەخوە فرۆشتنا پەترۆلێ ھاتییە رۆژەڤێ؟
بارزانی: ما چ مایە وان نەکری، وان ھەموو تشتەک کرییە، بودجە بڕییە، کو رامانا وی ئەوە وان نانێ خەلکێ مە بڕییە، ئەم چ ژ بەغدا وەرناگرین، تشتێ ئێکانە یێ ئەو بشێن بکەن، رێکێن ئەسمانی ل ھەمبەر مە بگرن، ئەگەر ئەو تشتەکێ وەسا بکەن دێ مە ژی کارڤەدان ھەبیت و ئەم دەستڤالا ناراوەستین، ئەم حەز دکەین رێکێن ئاشتییانە بگرینە بەر ب دیالۆگ و تێگەھشتن، مە خوینرێشتن و توندوتیژی نەڤێت، دێ پاشی بزاڤێن وان بینین دێ مە ژی کارڤەدان ھەبیت.
ئێف پی: چ جۆرێ کارڤەدانان؟
بارزانی: ھندە، ل دۆر وێ پرسێ بەسە.
“بارزانی: ناوچەیێن کوردستانی چ بڕیارێ بدەن دی رێزێ لێ گرین”
ئێف پی: تو ھزر دکەی ئەڤ رێفراندۆمە دێ رێیا بڕیاردانا چارەنڤیسی بۆ کەمینەیین دی ل ئیراقێ ڤەکەت؟
بارزانی: ئەم د گەل کەمینەیێن دی نە کانێ چ چارنڤیسێ ئەو بۆ خوە د ھەلبژێرن، ئەگەر بخوازن د ھەرێمێ دا بن یان پەیوەندی دگەل بەغدایێ دا ھەبن، یان رێیەکا دی بھەلبژێرن، بلا وەک وان بیت.
ئێف پی: وە شیان ھەنە مادەیا ١٤٠ ل دەڤەرێن بن کونترۆلا خوە بجھبینن، دێ ژ خەلکێ وان دەڤەران ھێتە پرسین کا ئەو دخوازن ببن پارچەیەک ژ ھەرێما کوردستانێ د گەل پرسیارا کانێ دخوازن کوردستان سەربخوە بیت؟
بارزانی: بێ گومان، دێ ھەمان پرسیار ژێ ھێتە کرن.
ئێف پی: ئانکو د رێفراندۆمێ دا خەلکێ دەڤەرێن ناکۆک دێ شێن دیار کەن کا ئەو دخوازن پشکەک بن ژ کوردستانێ؟
بارزانی: نە، ئەو پرسیار نابیت، وان بژاردە ھەیە دەنگی نەدەن، ئەگەر وان رێفراندۆمەکا دی دڤێت بلا بۆ پشتی دەمەکێ دی بیت، بۆ نموونە ئەگەر ھندەک عەرەب و تورکمان و کریستیانان حەز نەبیت پشکەک بن ژ ھەرێمێ، ئەو پێدڤییە د رێفراندۆمەکا دی دا ئەو ب خوە بڕیارا خوە دیار بکەن.
ئێف پی: لێ بۆچی ژ وان نەھێتە پرسین کانێ دخوازن ببن پشکەک ژ کوردستانێ؟
بارزانی: ئەڤە مژارەکا تەکنیکی یە، مە لژنەیا رێفراندۆمێ ھەیە و کۆمسیۆنا ھەلبژارتنان، ئەو بۆ وان ڤەدگەڕیت، دێ تنی پرسەک د رێفراندۆمی دا ھەبیت.
ئێف پی: ل دۆر حەشدا شەعبی، نھا گۆتن ھەنە کو باس ل کۆریدۆرەکێ شیعەیان ژ ئیراقێ بۆ سووریا دکەن، حەشدا شەعبی پشکداری د ئۆپەراسیۆنێن مووسل و نێزیکی شنگالێ ژی کرن، نێرینا ھەوە چییە و ڤێ یەکێ چ کاریگەری ل سەر کوردان ھەیە؟
بارزانی: ئەم ب ئێک چاڤ ل حەشدا شەعبی نا نێرین، ئەو دو پشکن، پشکەکێ قوربانیێن مەزن د شەڕی دژی داعشێ دا داینە، وان خوین دایە، مە رێزەکا مەزن بۆ وێ قوربانیدانێ ھەیە، لێ پشکەکا دی ھەیە کو حەشدا شەعبی بۆ خوە بکاردئینن بۆ ڤەشارتنا گەلەک شاشییان.
ئەرکێ سوپایێ ئیراقێ و پۆلیسین ئیراقێ یە ناوچەیێن سنۆری بپارێزن، ئەگەر حەشدا شەعبی رژد بیت کو ل وان ناوچەیان بمینیت، دێ گەلەک ئارێشە ژێ چیبن.
“بارزانی: حەشدا شەعبی ل شنگالێ بمینیت دێ گرفتێن مەزن روودەن”
ئێف پی: نێرینا تە بۆ حەشدا شەعبی ل شنگالێ چی یە؟
بارزانی: ھەبوونا حەشدا شەعبی ل باشۆرێ شنگالێ بنپێکرنەکا مەزن بوو بۆ وێ رێککەفتنا مە د گەل ئەمریکا و سوپایێ ئیراقێ دا کری، ئەم ریککەفت بووین، یەکەیەکا پیشمەرگە و یەکەیەکا سوپایێ ئیراقێ ل وان جھێن نھا حەشدا شەعبی لی ھاتینە خوەجھکرن، بۆ دەمەکێ درێژ بوو ئەو ناوچە ھاتبوونە پاقژکرن، تنی پێدڤی ب ھەبوونا ھێزەکێ بوو، لێ بەھانەیا سوپایێ ئیراقی ئەو بوو کو ئەو ب ئۆپەراسیۆنا باژاڕێ مووسلێ ڤە د مژوولن، لەو حەشدا شەعبی پێگیری ب رێککەفتنێ نەکر و ھاتە ئەوان ناوچەیان. ئەز دوبارە دکەم ئەگەر حەشدا شەعبی ل وان ناوچەیان بمینیت و حوکمی بکەت دی گەلەک ئارێشەیان پەیدا کەت.
ل دۆر داعشێ ژی، ھەر ئالییەکی شەڕی داعشێ بکەت ھەڤپەیمانێ مەیە، لێ د پاشەرۆژی دا، پێدڤییە خەلکێ وێ دەڤەرێ چارەنڤیسی خوە دیار بکەن، جڤاتا پارێزگەھـ و دەڤەردارییان، دەڤەرێ ب رێڤە ببەن، پێدڤییە پۆلیسێن خوە یێن تایبەت ھەبن کو خوە ب پارێزن، نابیت حەشدا شەعبی یان ھەر ھیزەکا دی ل وێ دەڤەرێ ھەبیت.
ئێف بی: چێدبیت ئێزدیێن شنگالێ شیان ھەبیت پەیوەندییا خوە د گەل وان ھێزان دیار بکەت؟
بارزانی: پێدڤییە ئێزدی د ئازاد بن بڕیارا سەرەدەریکرنا دگەل وان ھێزان دا بکەن، ژبەرکو مە خوینا پێشمەرگەیێن خوە دایە ب مەرەما وێ یەکێ کو وان ئەڤ ئازادییە ھەبیت، نەتنی ئێزدی لێ ھەموو خەلکێ ل وان دەڤەران پێدڤییە د ئازاد بن کانێ دێ کێ ھەلبژێرن و پشتەڤانییا کی کەن.
ئێف پی: ل دۆر دەڤەرێن ناکۆک، چ میکانزم دێ ھیتە بکارئینان کو ئەو بڕیارا خوە بدەن؟
بارزانی: ئەگەر ئەو نەخوازن پشکەک بن ژ ھەرێما کوردستانێ رامانا وی ئەوە ئەو دی پشکەک بن ژ بەغدا، میکانزم ئەوە، ل وان دەڤەران ھەکەر ئەو بێژن نەخێر د رێفراندۆمی دا، ئانکو ئەو دخوازن د گەل بەغدا بن، مە چ ئارێشە د گەل وێ یەکی نینە.
ئێف پی: تە چ نەرازیبوون نینە کو ئەو گرۆپ رێفراندۆما خوە رێکبێخن و بێژن کو ناخوازن پشکەک بن ژ کوردستانێ؟
بارزانی: ھەلبەت، ئەگەر خەلکێ وان ناوچەیان تشتەکێ وەسا ریکبێخن و پڕانی بێژن ناخوازین د گەل کوردستانێ بین، مە رێز بۆ بڕیارا وان ھەیە.
“بارزانی: بۆ ھەلبژارتنێن بھێت خوە بەربژار ناکەم”
ئێف پی: دێ ھەلبژارتن پشت رێفراندۆمی ھێنە کرن، دێ ھەلوەستێ تە چ بیت و دێ دەست ژکارکێشی؟
بارزانی: ئەز خوە د ھەلبژاتنان دا بەربژار ناکەم.
ئێف پی: سەرخوەبوونا کوردستانێ چەندا گرنگە بۆ تە؟
بارزانی: ئەز بۆ سەرخوەبوونا کوردستانێ ژ دایک بوویمە، دەمێ ئەز ژ دایک بوویم مالا مە بارزان ھێلا بوو و چووبووینە مھابادێ بۆ پشتەڤانیکرنا کۆمارا کوردستانێ ل مەھابادێ، ئەز ل ویرێ ژ دایک بووم، من چەک ھەلگرت دەمی ئەز شازدە سال، ھەموو ژیانا من بۆ سەرخوەبوونا کوردستانێ بوویە.
“بارزانی: دخوازم ل بن سیبهرا ئالایێ كوردستانا سهربهخۆ بمرم”
بۆ ئێکەم جار د دیرۆکا کوردستانێ دا، ئیکەم کۆمار کۆمارا کوردستانێ ل مەھابادێ بوو، دەمی ئالایێ کوردستانێ بلند کری ئەز ل بن سیبەرا وی ئالای ژ دایکبووم، من د ڤێت ئەز ل بن سیبەرا ئالایێ کوردستانا سەربخوە دا بمرم.
ئێف پی: ئانکو خەباتا تە گرێدایی بدەستڤەئینانا سەرخوەبوونا کوردستانێ یە؟
بارزانی: ھەر تشتی من کری بۆ سەرخوەبوونا کوردستانێ بوویە.
ئێف پی: وەکی تە گۆتی، تو ل کۆمارا کوردستانێ ژدایک بوویە، تە ژیانا خوە د خەباتێ دا بۆراند بۆ سەرخوەبوونا کوردستانێ، تو دبێژی تو د کۆمارا کوردستانێ دا بمری؟
بارزانی: دێ یێ دلشاد بم ھەکەر د کوردستانەکا سەربخوە دا بمرم.
“بارزانی: ژ جیھانا ئازاد دخوازم دژ نەراوەستن”
ئێف پی: ب ھزرا تە ئەو یەک دێ چیبیت؟
بارزانی: ئەم یا د شیان دا دکەین بۆ سەرخوەبوونا کوردستانی، ئەڤ ھەموو گاڤە ژی بۆ وی ئارمانجێ نە. لێ یاگرنگە بێژین ئەم دژی توندوتیژیی نە، دخوازین د دیالۆگەکا ئاشتییانە دا دەرباز بین دگەل تێگەشھتن و مفایێ ھەڤپشک، دی ھەڤکارییێ دگەل عەبادی دا زێدە کەین و ھەروەسا د ناڤبەرا ھێزێن پێشمەرگە و سوپایێ ئیراقێ ژی دا ل دژی تیرۆرێ.
داخوازا من بۆ جیھانا ئازاد ئەوە ل دژی بنەمایێن خوە نەراوەستن ب دژایەتیکرنا مافێ دیمکراسی و ئاشتییانە یێ نەتەوەیێ مە.
بۆ وان ئەوێن دبێژن ب ڤێ گاڤێ دێ نەئارامی ل دەڤەرێ زێدە بیت، ئەز دبێژمێ بەروڤاژی، یا مە دڤێت رێگرتنە ل خوینرێشتنەکا پتر ل دەڤەرێ.
تُتاح هذه الصورة أيضا في: کوردی