تۆرا لالش
قەڵەوی مه‌ترسیه ل سه‌ر ساخله‌میا زارۆكی
ل دووڤ ڕێکخراوا تەندروستیا جیهانی (WHO)، قەڵەویا زاڕۆکان کێشەیەکا گرنگ و بەلاڤبووی یە ل سەرانسەری جیهانێ، ئەڤ بابەتە بوویە ئه‌گه‌رێ کو ڕێکخراوا تەندروستیا جیهانی هشیارکرنەکێ بدەت دەربارەی کاریگەریێن وێ لسەر نڤشێن داهاتی، زێدەبوونا کێشی د تەمەنێ زاڕۆکینیێ دا دکارە ببتە ئەگەرێ کێشەیێن تەندروستیێ یێن گران د داهاتیدا، وەک نەخۆشیا شەکرێ و نەخۆشیێن دلی.
ژبەر ڤێ چەندێ، پێدڤی یە گرنگی ب ڤێ کێشەیێ بهێتە دان و گاڤێن ڕاست و دروست بهێنە هاڤێتن بۆ کێمکرنا وێ.
ئه‌گه‌رێن بلند بوونا ڕێژا قەڵەویێ د ناڤ زاڕۆکاندا
خوارنا نەتەندروست ئێک ژ هۆکارێن سەرەکی یە بۆ زێدەبوونا کێشا له‌شی د زاڕۆکاندا، گەلەک ژ وان پشتبەستنێ ب خوارنێن ب له‌ز، خوارنێن قوتیکری و ڤەخوارنێن گازی دکەن کو تێدا ڕێژەیەکا بلند ژ چەوری و شەکرێ تێدانه و هەروەسان کێمبوونا وەرزشی ژی هۆکارەکێ دیارە.
زاڕۆک دەمەکێ زۆر ل بەر شاشان دبۆرینن، چ د تەماشەکرنا تەلەفزیۆنێ بت یان یاریێن ڤیدیۆیی، ئەڤە ژی دبتە ئەگەرێ کێمبوونا چالاکیێن لەشی، هۆکارێن بۆماوەیی ژی دکارن ڕۆلەک هەبن د زێدەکرنا قەڵەویێ دا، لێ خویێن ڕۆژانە تا ڕادەیەکێ زۆر کاریگەریێ لسەر کێشی دکەن.
کاریگەریێن ساخله‌می و دەروونی یێن قەڵەویێ لسەر زاڕۆکان
قەڵەوی نە تنێ کاریگەریێ ل سەر ساخله‌مییا لەشی یا زاڕۆکی دکەت، بەلکو کاریگەریەکا مەزن ل سەر باشیا دەروونی و جڤاکی یا زاڕۆکی هەیە، دبت زاڕۆکێ قەڵەو ڕووبەڕووی ئاخفتنێن نەخۆش ببت ژلایێ هەڤالێن خوەڤە، ئەڤە ژی کاریگەریێ لسەر باوەریا وی ب خوە دکەت و هەستا دابڕینێ زێدە دکەت، هەروەسا دبتە ئەگەرێ کێشەیێن تەندروستی وەک بلندبوونا پەستانا خوینێ، زەحمەتیا هه‌لکێشانا بێهنێ د دەمێ نڤستنێدا، و کاریگەری لسەر شیانا یاریکرن و لڤینێ ب ئازادی.
ڕۆلێ مالباتێ د بەرگرتنا ژ قەڵەویێ دا
مالبات ڕۆلەکێ گرنگ دگێڕن د هاریکاریا زاڕۆکان بۆ پاراستنا کێشەکێ تەندروست، ب ڕێکا پەیداکرنا خوارنێن هەڤسەنگ کو تێدا فێقی و زەڤزەوات و پرۆتینێن تەندروست هەبن، هەروەسا پێدڤی یە دایک و باب هانا زاڕۆکێن خوە بدەن کو بەردەوام وەرزشێ بکەن، چ ب ڕێکا چالاکیێن قوتابخانێ یان یاریکرن ل دەرڤە و ژبلی ڤێ، سنووردارکرنا وی دەمێ کو زاڕۆک ب ئامیرێن ئەلەکترۆنی دبورینن گرنگە، دا دەرفەتا پتر بۆ لڤینێ هەبیت.
گرنگە کو هەر ڕۆژ دەمەک بۆ وەرزشێ بهێتە دانان، تەنانەت ئەگەر تنێ مەشیان یان بایسکلسواری ژی بی، ژبلی ڤێ، ڕێکخستنا دەمێ نڤستنێ ژی گرنگە، چونکی کێمخەوی کاریگەریێ لسەر میتابۆلیزمێ دکەت و ئەگەرێ زێدەبوونا کێشی زێدە دکەت.
چارەسەرکرنا قەڵەویا زاڕۆکان پێتڤی ب هەڤکاریا گشتی هەیە د ناڤبەرا مالباتان و قوتابخانان و جڤاکێ ب گشتی دا، ژبۆ پاراستنا تەندروستیا نەوەیێن داهاتی و دابینکرنا داهاتیەکێ باشتر بۆ وان.
تُتاح هذه الصورة أيضا في: کوردی
