گەلۆ چما ئێزدی ژ پەرلەمانێ عێراقێ بێ بەهر و دەست ڤالا مان؟
دلگەش سەلیم 
بۆ جارا گەلەكێ یە ئێزدی ب گشتی و ب تایبەت ل دەڤەرا شنگالێ ژ پەرلەمانێ عێراقێ بێ بەهر دبن،ژبەر چەند ئەگەرێن جودا جودا و هەردەم ئەم باجا شاشیێن خۆ یێن بەردەوام ددەین،ژ وان ژی گرنگترین خال بێ تفاقی و نەبوونا ئێكرێزیێ یە دناڤ مالا ئێزدیان دا.
هەبوونا ژمارەكا زۆرا كاندیدێن ئێزدیان و زالبوونا هەستێ هۆزایەتی (عشائر) ب شێوازەكی بهێز، خۆ ڤیان و خۆپەرستنا كەسۆكی بۆ كورسیكێن پەرلەمان و دەسەلاتێ لجەم تاكێ ئێزدی،هەروەسا هەبوونا رێژەكا زۆر یا پارتێن سیاسی لناڤ جڤاكێ ئێزدیان كو دبنە ئەگەرێن هەرە سەرەكی بۆ بەلاڤبوون و پرت پرتبوونا دەنگێن ئێزدیان كو دگەل هژمارا دەنگدەرێن ئێزدیان ناگونجن، بڤی شێوەی چ كاندیدێن ئێزدی نكارن رێژا پێتڤییا دەنگان ب دەستخۆڤە بینن،ژبەر هندێ هەموو جاران ل دەمێ راگەهاندنا ئەنجامێن هەلبژارتنا بێ ئۆمێدی و نارەزایەتییەكا مەزن دناڤ ئێزدیان دا سەرهەل ددەت، لەوما دبت ل پاشەرۆژێ كارڤەدانەكا مەزن پەیدابت،كو پێكهاتێ ئێزدیان ژ گەلەك ماف وداخوازیێن خۆ یێن رەوا بێ بەهر ببت،ب دیتنا من ئەڤ تاوانە ب ڕێژا پتر دكەڤتە دستۆیێ هەردوو پارتێن دەستهەلاتدار دا (پارتی و ئێكەتی) چنكو زۆربەیا تاكێن ئێزدیان لایەنگرێن هەردوو پارتێن ناڤهاتییە،بۆ چارەسەریا ئەڤێ ئاریشێ یا باشتر ئەوە ئەڤ هەردوو پارتە پێكولا ب دەستڤەئینان و دروستكرنا كورسیكێن (كوتا) بۆ ئێزدیان بكن چ ل پەرلەمانێ عێراقێ یان كوردستانێ بت و هەروەسا فەرە ل جڤاتێن پارێزگەهان ژی كوتا بۆ ئێزدیان بێنە تەرخانكرن، دیسان لسەر ئاستێ دام و دەزگەهێن حكومی و پۆستێن رێڤەبەرێن گشتی و تایبەت ژی كۆتایێن تایبەت بۆ ئێزدیان بێنە دابینكرن ژبۆ رازیكرنا جەماوەر و خەلكێ ئێزدی.
گەرەكە و فەرە ژی ل هەلبژارتنێن بێت پێداچوونەكا رژد ل هژمارا بەربژێرا بێتەكرن، داكو ئەڤ پێكهاتێ رەسەن ژ ماف و داخوازیێن خۆ بێ بەهر نەبن، ئەگەر نا دوێ باوەریێ دامە ئێدی گەلەك زەحمەتە تاكێن ئێزدی پەنج و دەستێن خۆ بۆ چ هەلبژارتنان مۆر بكەنەڤە.
تُتاح هذه الصورة أيضا في: کوردی