رەمەزان ورێزگرتن ل ئایینان
خالد ئەحمەد بادی
خودایێ مەزن هەمی مللەت یێن داین وهەر مللەتەكی زمانەك وشێوەك بۆ دیار كریە و هەر مللەتەكی پەیامبەرەك بۆ دەست نیشانكریە و داناندیە وپەرتۆكێن ئاسمانی بۆ هاتینە فرێكرن ب رێكا وان پەیامبەران وچ گۆمان تێدا نینە دەمێ خودایێ مەزن مللەت چێكرین ئەرد وجه ژی داینێ،چنكو خودایێ مەزن خودایێ هەمی مللەت وئایین وجیهانێ یە.
هاتنا هەیڤا رەمەزانا پیرۆز دیارییا خودایی یە بۆ مللەتێن بوسلمان وهەر مللەتەك وئایینەكی خودایێ مەزن دیاریەك دایێ مەرەمەك وعیبرەتەكە ونهێنیەكا ددانا وێ هەیڤا رۆژیان یان چەند رۆژان ب رۆژی بن لدووڤ یاسا ورێنمایێن ئایینێ وان وئێك ژوان مەرەمان ئەوە كو دا یێ زەنگین هاییش یێ هەژار هەبت وهەر دیسا دا یێ تێر هاییش یێ برسی هەبت و زۆر مەرەمێن دی هەنە،نۆكە ئەم یێ دهەیڤا رەمەزانێ دا ئایینێ ئێزدی ومەسیحی وئەرمەن وكلدان وئاشووری زۆر رێزێ ل مللەتێ كوردێ بوسلمان دگرن وزۆر جاران ژی ئایینێن دی پیرۆزباهییان ب هاتنا هەیڤا رەمەزانا پیرۆز ل موسلمانا دكن وهەروەسا بوسلمان ژی پیرۆزباهییان ل وان ئایینێن دی دكن وب كەیف وخۆشی پشكداریێ درێورەسمێن جەژن وپیرۆزی وهەلكەفتێن هەڤدو دا دكن،ل دەمێ كاری دا چ ل رێڤەبەری یا یان لناڤ دام ودەزگەهێن دی یێن میری ورێكخراو وحیزبی دیسان رێزێ ل هەڤدو دگرن وهەروەسا یێ مەسیحی وئێزدی مینا یێ بوسلمان چ تشتا ناخۆت یان ڤەخۆت ژبەر برایێن خۆ یێن موسلمان،دیاردەكا دی یا جوان هەر سال ول هەیڤا رەمەزانێ كەسایەتی ل دەڤەرێن جودا جودا ژ كوردستانا رەنگین ژ ئێزدی ومەسیحی وكلدان وئاشووری وئەرمەن فتارێن بەرفرەه ومەزن ددانن بۆ كومێن مەزن یێن بوسلمانان وئەڤە وێ چەندێ دیار دكت كو پێكڤەژیان لناڤبەرا كوردێن بوسلمان وكوردێن ئێزدی وكوردێن مەسیحی زۆر یا بهێزە ومینا تابلۆیەكێ رەنگینە هەردەم لبەر چاڤێن هەمی كوردستانیان دئێتە نیشان دان،دوژمنان زۆر هەولدانێن بهێز كرینە كو ئایین ومللەتێن ل كوردستانێ هەین بكەتە دوژمنێن هەڤدوو وئەو مفای ژێ ببینن لێ هەولدان وپیلانێن وانان ب كەڤری كەفتینە وچ مفا تێدا نەبوو و رۆژ بۆ رۆژێ پەیوەندیێن كوردێن بوسلمان وكوردێن مەسیحی وكوردێن ئێزدی ل كوردستانا شرین كوردستانا ئاشتیخواز بهێز تر لێ هاتینە وبوویە تیرەك ژەهراوی و بناڤ چاڤێن دوژمنان كەفتینە.
بلا ئەم كوردستانی بزانین دوژمنێن مە بتنێ كوردێن بوسلمان نە دكوشتن وئەنفال بسەرێ هەمی كوردستانیان ئیناینە،بەلكو وان دوژمنان چ جوداهی لناڤبەرا مە دا نەكریە ودگۆت چ جوداهی نینە لناڤبەرا مەسیحی وئێزدی وبوسلمان وبتنێ دگۆت كوردن ودڤێت ئەوان دقازانكا نەتەوا عەرەبی دا بكەلینین وب توپزی هەمی دكرنە عەرەب وبلا ئەڤ رۆژە ل بیرا مە بن،ئاخا كوردستانێ ئاخا مە هەمیانە وبلا سنوورێن وەلاتێ خۆ ژ دوژمنان ب پارێزین وبتنێ دێ مافێن مە هەمیان دڤێ ئاخێ دا ئێنە چەسپاندن وبلا رەمەزان و هەلكەفت وپیرۆزیێن هەمی ئایینان ل كوردستانێ ببنە پالپشتەكێ بهێز بۆ پێشكەفتنا ڤان پەیوەندیێن بهێز لناڤبەرا كورد وعەرەب وتركمان ومەسیحی وئاشووری وكلدانی وئەرمەنی بوسلمانان دا..سەربەرز وبهێز بت كوردستان.
تُتاح هذه الصورة أيضا في: کوردی