تۆرا لالـش
دەمەکی درێژە هەڤرکیا د ناڤبەرا هێزێن سیاسی یێن وەلاتێن دەستهەلاتدار ل سەرانسەری جیهانێ و ئەو رژێمێن ب چاڤسۆریی دانوستانێ دگەل وەلاتێن رەخ و روویێن خۆ دکەن دەستپێکریە و ئەڤێ چەندێ ژی رەوشا دەڤەرا رۆژهەلاتا ناڤین بەر ب تێکچوونەکا خراب و وێرانکار ڤە بریە و زۆربەیا وەلاتین کەنداڤی کەڤتینە د مەترسیەکا دژوار دا و نەئارامیەکا مەزن د ناخێ تەڤایا گەلێن دەڤەرێ دا ب گشتی پەیدابوویە ژ ئەگەرێ ئەوان کاودانێن هاتینە پێش.
بێ گومان ئەگەرێن ئەوێ زۆردارییا ل سەر زۆربەیا گەلێن دەڤەرێ ژ بێ پویتەیی و پاشگوهڤەهاڤێتنا سیاسەتا رژێم و دەستهەلاتدارێن وەلاتێن وان ب خۆ بوویە، ژبەر کو سەرەرایی رەوشا سیاسی یا ئالۆز و ئەو گوهۆرینا سیاسی و کاودانێن بلەز ل جیهانێ رووددەن، رێگریەکا مەزن ل بنەمایێن ئازادیا جڤاکی د هندورێ ئەوان وەلاتاندا ژی کریە و ئەڤ چەندە ژی بوویە رێخۆشکرنەکا ئاسان و ئەگەرەکی سەرەکی بۆ دەستێوەردانا وەلاتێن بیانی د کاروبارێن وەلاتێن دەڤەرێ دا و رەوشا جڤاکێن وان بەر ب ئالۆزی و ئاستەنگیەکا خراب ڤە بریە، لەوا وەکو دیار ل ئەڤێ قووناغێ دا رۆژهەلاتا ناڤەراست بوویە مەیدانا هەڤرکی و شەر و پێکدادانەکا وێرانکەر، و زەرەرمەندێن سەرەکی یێن ئەڤێ چەندێ ژی ئەو گەلێن ئارام و ئاشتیخواز و جڤاکێن بێ گونەهـ بووینە.
هەر دیسان مایتێکرنا وەلاتێن دەستهەلاتدار و خودان هێزین لەشکەری و شیانێن مەزن ژی گەلەک جاران ئالۆزی دناڤبەرا گەلێن دەڤەرێ دا دروستکرینە و سیاسەتەکا دژوار ب سەر وان دا سەپاندینە و دانوستاندنەکا خراب دگەل وان کرینە و هەولێن ب سەردابرنا وان داینە ب رێکا درووستکرنا ئاریشەیێن مەزن ل وەلاتێن وان دا، و هەروسا بووینە ئەگەرێ لێککەڤتن و هەڤرکیەکا سیاسی دناڤبەرا گەلێن دەڤەرێ دا، ئەڤ چەندە ژی ژ پێخەمەت پاراستنا بەرژەوەندیێن گشتی یێن گەل و وەلاتێن وان ل دەڤەرێ بوویە و روودانا کاودانێن ل سەر وەلاتێ ئیرانێ نموونەکا دیار و بەرچاڤ یا ئەڤێ راستیێ بوویە.
هەروهسا کوردستان ژی ئێک ژ ئەوان وەلاتێن دەڤەرێ بوویە، کو زیان پێکەڤتی و گەلێ وێ کەڤتیە مەترسیێ ژ ئەگەرێ دروستبوونا ئاریشەیێن سیاسی و مایتێکرنا لەشکەری د ناڤبەرا ئەمریکا و ئیسرائیلێ دگەل کۆمارا ئیسلامی یا ئیرانێ یا کو بوویە مەیدانا جەنگەکی دژوار و هەموو سازیی و دەزگەهێن وێ یێن گرنگ هاتینە هەلوەشاندن و چەندین سەرکردەیێن وێ هاتینە ژ ناڤبرن و سیستەمێ وێ یێ ئەتۆمی هاتیە تێکدان و مەترسیا ل سەر گەلێ وێ هەر یا بەردەوامە، لەوا رژێنا وێ ژی زۆربەیا وەلاتێن کەنداڤێ و دەڤەرێ کرینە ئارمانج و هەولێن تێکدانا رەوشا گەلێن وان د دەتن.
ئیران وەلاتەکی هەڤسنوورە دگەل کوردستانێ ب درێژیا سنوورێ رۆژهەلات و هەر دەم پەیوەندیێن هەردوو وەلاتان ل سەر بنەمایێ رێزگرتنەکا هەڤپشک بووینە د بوارێ سیاسی و ئابۆری و بازرگانی دا، بەلێ پشتی ئەڤان روودانا ئێکسەر رژێما ئیرانێ وەکو زۆربەیا وەلاتێن کەنداڤی کوردستان ژی کریە ئارمانج و گەلێ وێ ئێخستیە د مەترسیێ دا و گەفێن ب سەرداگرتنێ لێ کرینە و دیسان ب مۆشەکان وەلاتێ وان گوللەبارانکریە، ئەڤە ل دەمەکی دا کو ب هیچ رەنگەکی کوردستان نەبوویە بەشەک د ئەڤێ هەڤرکیێ دا و زیان ب هیچ وەلاتەکی نەگەهاندیە، و هەموو جاران خۆ ژ ململانا دناڤبەرا هەردوک ئالیان دا دوورکرییە و هەول دایە ئارامیا گەل و وەلاتێ خۆ ب پارێزیت، بەلێ هەر وەکو کینەکا کەڤنار د دلێ داگیرکەرێن گەلێ کوردستانێ دا هەردەم ب چاڤەکی دوژمنکاری بەرێ خۆ داینە ئەڤی گەلێ ئاشتیخواز و هەولێن تێكدانا ئارامیا وی کرینە، ئەڤ چەندە ژی ژ ئەگەرێ ئەوێ زۆرداریا ل درێژیا دیرۆکێ ل سەر مللەتێ کورد دهاتە کرن و چاوا ب زۆری مافێ وی یێ رەوا پوچەل دکرن و چاڤ ب ئازادی و ئێمناهیا وی رانەدبوو، و ئەڤ چەندە ژی بوویە جهێ دلگرانیا تەڤایا مللەتێ کورد ل هەرچار پارچان و بێ ئۆمێدیەک د ناخێ وی دا پەیداکریە.
لێ بەلێ هەر چەند ب هێز دوژمنێن کوردستانێ ب ئەڤان جۆرە کریارێن خۆ یێن خرابکار هەول بدەن ببنە ئاستەنگ و رێگریێ ل پێشڤەچوونا شارستانیەت و خەبات و بەرخۆدانا ژ بۆ ئازادیا وەلاتێ خۆ کرین ب شانازیێ بکەن، ل ئەوی دەمی ورەیا گەلێ کوردستانێ پێخەمەت گەهشتنا ئارمانجێن وێ یێن سەرەکی ب هێزتر دبت و ب هیچ رەنگەکی دەستان ژ رێبازا خۆ یا پیرۆز بەرنادەت، هەتا کو ب مافێ خۆ یێ رەوا شاد و بەختەوهر نەبت و کوردستانەکا سەربخۆ و ب ئاڤەدان ل ژێر ئالایێ پیرۆز نەبت و دەمێ ئازادیێ نێزیک بوویە.
تُتاح هذه الصورة أيضا في: کوردی