ŞINGAL – Rojane nêzîkî 50 malbat vedigerin warê xwe
Şingal (Rûdaw)
Di nav mehekê de 700 malbatên xelkê Şingalê û derdora wê, ji kampên parêzgeha Duhokê, vegeriyane navçeya xwe û daxwazê ji Hikûmeta Herêma Kurdistanê dikin ku xizmetguzariyên av, elektrîk û tendirustiyê ji bo wan werin dabînkirin.
Tevî ku navenda navçeya Şingalê ji ber şerê DAIŞê wêran bûye û hîn xizmetguzarî têde nînin, xelkê Şingalê vedigerin cih warên xwe.
Welatiyê bi navê Kemal Hacî Murad diyar kir, ku weke gelek malbatên din, ew jî vegeriyane Şingalê û destnîşan kir, ku her roj nêzîkî 50 malbat vedigerin Şingalê û pêwistiya wan bi xizmetguzariyên av û elektrîkê heye.
Endamê Encumena Navçeya Şingalê Xwedêda Murad Hesen ji Rûdawê re ragihand, ku heta niha ji bo avakirina Şingalê ti alî pêngave cidî neavêtine û diyar kir, ku ew weke îdara Şingalê, weke qaymiqam û encumen, ji hikûmeta navendî û Hikûmeta Herêma Kurdistanê daxwaz dikin, ku alîkariya xelkê were kirin û pêwîstiya elektrîk û avê bêne dabînkirin, da ku xelk bêtir vegerin warê xwe.
Weke din Xwedêda Murad Hesen amaje bi yekê kir, ku rojane 50 – 60 malbat vedigerin Şingalê.
Salek û 8 meh in, ku Şingal ji aliyê hêzên Pêşmerge ve hatiye rizgarkirin.
تُتاح هذه الصورة أيضا في: Kurdî