مرۆڤ و وەهم
جوان عزەت
پشكا ئێكێ
رزگاركرن نە تشتەكە كو مرۆڤ ژێ پەشیمان ببت، بەلكو كارلێكەرە ژبۆ ب دەستڤەئینانا بها و ئێدیەمێن هێزو هەبوونا مرۆڤی، گرنگترین پرسیارا كو مرۆڤ ئاراستەی خۆ دكت ئەوە دەمێ مرۆڤ دبێژت وەهم چیە؟ یان ژ چ پەیدا دبت،یان دێ چاوان د واتەیا هەر تشتی گەهت هەتا كو بزانیت ئەو تشتەكە هێژایی هەبوونێ، نە ترسێ یە.
دبت گەلەك جاران مرۆڤ بۆ خۆ جۆرە وەهمەكێ دروست دكت بێ كو بزانت ئەو وەهم دێ باندۆرێ ل هەست و هزر و دەروونێ مرۆڤی كت،رەنگە ئەو چەندە ژی جۆرەكێ دی یێ تێگەهشتن و جیاوازیێ دناڤ ژیانا مرۆڤی دا پەیدا دكت،كو رۆژ بۆ رۆژێ مرۆڤ بەرەف مرنەكا نە زیندی بچت،بەلێ ب هزرا من كۆمەلگەه دئێتە دانان داكو گهۆرین و دەستكارێن نوو پەیداببن و هزركرن ژی ببتە بەشەكێ سەرەكی بۆ جۆلاندنا ڤێ وەهمێ،كورد هزر دكن كو وەهم ب تنێ دناڤ گیانێ مرۆڤی دا پەیدادبت ژبۆ كوشتن و هندابوونا مرۆڤی، بەلێ ئەڤە نائێتە وێ واتەیێ كو ئەو بەشەكە ژ كوشتنێ، بەلكو بەشەكە ژ وێ ئەجندەیا هشیاریێ یا كو بەرێ مرۆڤی ددەت رێكا هەبوون و دیاركرنا رەهێن ئاستەنگان د خالێن چارەسەكرنێ دا و مرۆڤی دەربازی قوناغێن جودا جودا دكەت هەتا دگەهتە قۆناغا مرۆڤبوون و ئازادیێ.
ئەگەر ل كەلتوورێ كوردی بنێرین، دێ گەلەك جۆرێن وەهمان بینن، كو دناڤ ژینگەها مە دا هەرتشت ل جەم تاكی بوویە جۆرە ترسەك كو چ هزركرن بۆ نە بت، ژبەركو مرۆڤ بوونەوەرەكە حەزو ئارەزوویێن جیاواز هەنە و بەردەوام دخوازت كۆمەلگەهەكێ دروست بكت كو مرۆڤ بوون و مەدەنیەت جوانتر و خۆشتر و باشتر بێتە دیتن، بەلێ د هزرا وی دا هەموو ئەڤ مەسەلە بووینە خەون، ئاشوپ و هزركرن، ئەقل و بەهرە ژی دناڤ ئێكدا تێكەل بووینە، لەورا هەتا نهۆ هەست پێ ناكەت كو ژینگەهەكا ئارام هەیە،چنكو هەر تشتێ وێ ب چاڤێ ئالۆزی دبینت و بێ كو هزربكت ئەو بوونەوەرەكێ ئازادە و د دونیایەكا مەزن دا دژیت.
بنێرە،ئەوا كو شرۆڤەكرنا هەرتشتی ب شێوازێ وەهم و ترسێ پێشكێشی هزرا مرۆڤی و مرۆڤایەتیێ كری و هەتا تاك گەهاندینە وی ئاستی، كو هەست و ئیدارەكن خۆ بهێلن دناڤ چارچۆڤێ جەسەدی دا بێ كو بزانن دێ ب چ رێ و رەفتار سەرەدەریێ كن و ئەركێن خۆ برێڤەبەن هزرا ژینگەهێ بوویە،واتە ل ڤێرە پرسیارا كو ئاراستەی مە دبت، ئەرێ ئەو چ تشتە بوویە ئەگەرێ ژناڤبرنا ڤێ راستیێ؟ ئەزدبێژم، كۆمەلگەهێ بەردەوام پێویستی ب هەبوونا مرۆڤان هەیە كو بكارت سەركێشەیەكێ دهزرەكا ئازاد دا بكت و ژینگەها سەقامگیر ئاڤا بكت،بەلێ مخابن دەمێ ئەم هزر د ئارامیا ژینگەها خۆ دا دكەین، وێ دیتن و راستیێ نادەت مرۆڤی كو بكارت هزركرنا ئەرێنی ب جورئەتەكا راستەقینە دیار بكت،ژلایەكێ دی ڤە،یان كۆمەلەكا سیفەتێن نەرێنیان هەیە، ژ ئەگەرێ وێ وەهمێ نكارت د كۆمەلگەهێ دا دیار بكت،یان بوویەرێن رۆژەڤێ باندۆر ل ئالاڤێن وی كریە، یان ژی زۆربەریا جاران دخوازت مرۆڤبوون و زانستێ خۆ پێشكێشی كۆمەلگەها خۆ بكت، بەلێ رەفتارەكا دەروونی روبەروی وی دبت،ئەڤە ژی وە دكت مرۆڤ ب هێزا ئەقل و زانستێ خۆ ل دەوروبەرێن خۆ بنێرت و وێنەكێ واقعی بۆ ڤێ ژینگەها لەنگ و سەقەت ئاڤا بكت.
ئەنجام: ژینگەه دئێن دروستكرن داكو فەرهەنگێن بهادار و واقعی/ راستی بۆ ژیانێ بێنە دیتن،بەلێ ژینگەها كوردی یا هاتیە دروستكرن، داكو مرۆڤان دووری ژیان و لێكدانا بەرهەمێن دیاركری بۆ دابینكرنا هێز و پێداویستیان بكت، ئەڤجار ب هزرا من ئەگەر وەهم هەبت هینگی راستی ژی نابت، ئەگەر راستی هەبت هینگی وەهم نابت،لەورا مرۆڤ نەهاتن ژیانێ دا خۆ خەلەت بكن،بەلكو هاتن دا داهێنانان بۆ زانستێ مرۆڤایەتی و بەرگریا ژناڤبرنا ئەفسانەیان بكن و یاسا و رێسایان بۆ كۆمەلگەهێ دابمەزرینن.
تُتاح هذه الصورة أيضا في: کوردی