هێزێن شكەستن ئینایی باوەری ب دیموكراسیەتیێ نینە
صباح سمیر
قۆناغا پشتی هەلبژارتنێن 10ی ئۆكتوبەرا 2021ێ هاتینە ئەنجامدان وێ ببە دەرفەتەك نوو ل هەمبەر عێراقەكا نە د ژێر باندۆرا سیاسەتا ئەنجیندایێن میلیشیاتێن بسەر ئیرانێ ڤە، چنكو عێراق كەفتە د قۆناغەكا نوو دا، ژبەركو دماوێ بۆری دا لایەنێن شیعی یێن گرێدایی سەر ب ئیرانێ ڤە سەركەفتی نەبوون د دەستهەلات و ب رێڤەبرنا دەولەتێ دا، ئەوان كار لسەر بەرژەوەندیێن دەرڤە دكرن لسەر كیستێ خەلكێ عێراقێ، شكەستنا لایەنێن بهێز دناڤا پرۆسەیا سیاسی یا عێراقێ دا لایەنگرێن ئیرانێ ل عێراقێ شكەستنەكا مەزن ئینان و ئەنجام ژی نە دبەرژەوەندیا وان دا بوون، ژبەركو سەرەرای هەبوونا هێزەكا لەشكەری و ئابووری یا بهێز لێ ڤێ جارێ ئەنجامێن داویێ سەركردێن دەستهەلاتێ یێن د ناڤ مالا شیعەیان دا شۆك كرن، ئەڤە ژی وێ چەندێ دیار دكت كو خەلكێ عێراقێ ب شێوازەكێ مودرێن ئەو لایەن خەلاتكرن و نەهێلان ببنە ژمارێن ب زەحمەت دهاوكێشەیا سیاسی یا عێراقێ دا،لدۆر شكەستنا ڤان لایەنان كو هەول ددەن بهێزا چەكی و میلیشیاتێن خۆ كارتێكرنێ ل ئەنجامان بكن و دەستكەفتێن خۆ بپارێزن و یە دیارە كو ئەڤە ژ دەما پشتی هەلبژارتنا لایەنێن نەسەركەفتی دخوازن جادەیا شیعەیان ب ئازرینن و بیننە سەر جادا داكو سەنگا خۆ دیار بكن، لێ دراستی دا ئەڤ قۆناغ دێ ب زەحمەت بت و پێشهاتێن نوو وێ هەبن بۆ قۆناغا داهاتی و رەنگە چەند لایەنێن شكەستخواری هێزا خۆ یا چەكداری ل باشوور و ناڤەراستا عێراقێ بدەنە دیاركرن و گڤاشتنا ل لایەنێن سەركەفتی یێ وان دەڤەران بكن، لێ ئیرۆ ژ هەموو قۆناغا زێدەتر دەم هاتیە ئەڤ لایەنێن شكەستی دووری دەستهەلاتا نوو بن،ژبەركو خەلكێ ئەو سزادان و گەلەك ژوان دوژمنێن سەر سەرختێن هەرێما كوردستانێ بوون، لگۆر دیتنا من ڤێ جارێ وێ سەنگا كوردان ل بەغدا گەلەك باشتربت ژ خۆلا دەربازبووی، چنكو هەبوونا ئێكرێزیێ دناڤ لایەنێن كوردستانی دا زۆر یا گرنگە بۆ پاراستنا قەوارەیێ هەرێما كوردستانێ ل حكومەتا داهاتی یا عێراقێ دا و ب تایبەتی كێشەیێن دەڤەرێن ڤەقەتیایی مینا كەركوك و شنگال، و ڤەگەرا ئاوارەیان و بابەتێن پترۆل و بودجە و پێشمەرگەی وێ ئەولەویێت دانوستاندنا لایەنێن كوردستانی بن، تشتێ پێشبینی دكم كو لایەنێن كوردستانی وێ هەڤپەیمانیا دگەل وان لایەنان بكن یێن ڤان خالێن مە دیاركرین ژبۆ كوردستانێ وێ ئەڤ هەڤپەیمانی چارەنڤیساز بن و حكومەتا داهاتی وێ جیاوازتر بت ژ هەموو حكومەتێن قۆناغا بۆری.
تُتاح هذه الصورة أيضا في: کوردی