تۆرا لالـش – (دهۆک)
ب مەرەما ژ نێزیک ئاگەهداری ژ ڕەوشا جڤاکی و ڕەوشەنبیری یا ئێزدیان، ئەڤرۆ دووشەمبێ 9ـی ئادارا 2026ێ، سعود مستۆ، ڕێڤەبەرێ گشتی یێ کاروبارێن ئێزدیان ل وەزارەتا ئەوقاف و کاروباریێن ئاینی ل حكومهتا ههرێما كوردستانێ، سەرەدانا بارەگەهێ سەرەکی یێ بنگەهێ لالش یێ ڕەوشەنبیری و کۆمەلایەتی ل باژێڕێ دهۆکێ کر.
پێشوازی و هەماهەنگی
د سەرەدانا خۆ دا، ڕێڤەبەرێ گشتی ژ لایێ سەعید جردۆ، سەرۆکێ بنگەهێ لالش و ژمارەکا ئەندامێن دەستەیا بلند یا بنگەهی ڤە ب گەرمی هاتە پێشوازیکرن.
ههردوو ئالیان، بەحس ل گرنگییا هەماهەنگییا د ناڤبەرا سازیێن حکومی و ناڤەندێن ڕەوشەنبیری دا كر، دا کو ب هەڤڕا بشێن خزمەتەکا پتر پێشکێشی پێکهاتهیا ئێزدی بکەن.
تەوەرێن کۆمبوونێ، ڕەوشا ئێزدیان و ئاستەنگ
د تەوەرەکێ دی یێ کۆمبوونێ دا، هەردو ئالییان ب هووری ڕەوشا ئێزدیان ل سەرانسەری دەڤەرێ گەنگەشەکرن، ههروهسان تیشک ئێخستە سەر پێدڤیاتیێن مرۆڤی، ڕەوشەنبیری و ئایینی یێن ئێزدیان و ئەو ئاستەنگێن کو تا نوکە ل هەمبەر ڤەگەڕیانا ئاوارەیان و ئاڤەدانکرنا دەڤەرێن وان هەیی.
پەیاما ئارامیێ و پاشەڕۆژێ
هەردو لایەنان د کۆمبوونا خۆ دا هیڤی خواستن کو هەرچی زوویە بارودۆخێ سیاسی و ئەمنی یێ دەڤەرێ بەرەف ئارامییەکا تەمام بچت، دووپات کر کو سەقامگیری کلیلا سەرەکی یا ئاڤەدانکرنێ و ڤەژاندنا ژیانا ڕەوشەنبیری یە ل دەڤەرێن ئێزدیان.
د کۆتایییا دیدارێ دا، سعوود مستۆ دەستخۆشی ل کار و چالاکییێن بنگەهێ لالش کر وەک ناڤەندەکا گرنگا پاراستنا کلتوور و ڕەسەناتیا ئێزدییان، و بنگەهێ لالش ژی ئامادەییا خۆ بۆ هەر جۆرە هەماهەنگییەکێ دگەل ڕێڤەبەرییا گشتی دەربڕی.
تُتاح هذه الصورة أيضا في: کوردی