زێرێ زەر چۆ، بلا یێ كەسك بمینت
چنار ئەحمەد
پشتی ڤان سالێن داویێ كوردستان ب گشتی كەفتیە بن هندەك فشارێن ئابووری و سیاسی ڤە و بارێ ئابووری یێ تاكێ كوردستانی تێك چۆیی و خەلك كەفتینە دحالەتێن نەخۆش و بەرتەنگ دا،ژبەر پاشەكەوتكرن یان نەهاتنا مووچا دوەختێ خۆدا و نەبوونا دەلیڤێن كاری وەكریە خەلكەك یێ بەتال وبێ كار بمینت وبكەفتە د حالەتێن دەروونی دا،ژبەركو چ داهاتەكی وەسا نینە تێرا مەزاختیێن رۆژانە یێن وان بكت دگەل هندَ ژی پتریا مە فێربووینە زێدە مەزاختن و گهۆرینان و پشتی ڤان كاودانان ب زۆری خۆ رادگرن و ئەو دراڤێ كێم یێ بۆ دئێت نكارت ژیارا خۆ پێ ب بۆرینن ژبەرهندێ گەلەك ژ خێزانا بەرێ خۆدانە وی دراڤێ بەری هینگی ئانكو بەری چەند سالا كۆم كری ژبۆ نەخۆشی و دەلیڤێن بەرتەنگ ژ نشكەكێ ڤە دئێنە رێا مرۆڤی هندەكا ژی پەنا بریە بەر قەرا و هندەكان ژی ژ نەچار زێرێن هەڤژینێن خۆ فرۆتینە تاكو بكارن داهاتەكی بۆ رۆژانێن خۆ و خێزانا خۆ پەیدا بكن و ژین و ژیارا زارۆكێن خۆ دابین بكن.
ل ڤێرە ئەم دبێژین ئەڤە ژ دەستی مە دئێت و نكارین داهاتەكی زۆرتر بۆ خۆ پەیدا بكەین و كەفتینە دچارچۆڤەكی گرتی دا، مە زێری زەر ژدەست دا لێ مە داهاتەكی دی یێ هەی ئەم دكارین ب پارێزین و مفایی ژێ ببینین ئەو ژی سروشتێ جوان و ب پیت و زێرینێ خاكا كوردستانێ یە (زێرێ كەسك)، ئێدی دەمە ئەم دەست ب شۆرەشەكا چاندنیێ بكەین و هێز و شیانێن گەنجێن خۆ دڤێ شۆرەشێ دا ب مەزێخین وبەرێ خۆ بدەینە چاندنا بەروبومێن گشتوكالی و ل شوونا ئەم بەرهەمێن دەولەتێن دی بیننە دناڤ بازارێن خۆ دا ئەم بازارێن هەرێمێ و دەولەتێن دەوروبەر ژی ب بەرهەمێن خۆ یێن كەسكاتی گەرم و گۆر بكەین و ئەو داهاتی ژێ دئێت ژی ژ سنوورێن هەرێمێ دەرنەكەڤت ل شوونا هندەك دەولەتێن دی ئەم مفایی ژ وی دراڤی ببینین،ژبەركو مە جۆتیارێن زیرەك و شارەزا هەنە و ئەگەر تشتێ پێتڤی لبەر دەست بت مە باوەرە دێ بەرهەمەك باش بەرهەم ئینن بتنێ پێتڤی هندەك پشتەڤانیێ نە.
بڤێ رێ دێ كارین زێرێ خۆ یێ كەسك ب پارێزین و داهاتێ خۆ پێ زێدەكەین و پشكەكا كێشە و ئاریشەیێن خۆ یێن ئابووری چارەسەر كەین وتارادەیەكی ژبن فشارێن نەهنارتنا مووچا دەركەڤین، ژلایەكی دی ڤە دێ دەلیڤەیێن كاری ژی زێدەكەین و كارین ژمارەكا زۆر یا گەنجێن خۆ بكەینە خودان كار و ئەو ژی ژڤان پرۆژان مفاداربن وژ بن فشارێن دەروونی و بێ دراڤی قورتال بن.
تُتاح هذه الصورة أيضا في: کوردی